Բացահայտվել է Սև ծովում հունական նավթատարի վրա հարձակման հնարավոր պատճառը

Հունաստանի նավագնացության և կղզային քաղաքականության նախարար Վասիլիս Կիկիլիասը հայտարարել է, որ Սև ծովում հունական Maran Homer նավթատարի վրա անօդաչու սարքով իրականացված հարձակումը կարող է կապված լինել ԱՄՆ-ի կողմից ռուսական նավթի տեղափոխման սահմանափակումների մասնակի մեղմացման հետ։ Այս մասին հաղորդում է ТАСС գործակալությունը։

Նախարարի խոսքով՝ հարվածը կարող էր լինել արձագանք Վաշինգտոնի այդ որոշմանը։ Նման վարկած են առաջ քաշել նաև հունական լրատվամիջոցները՝ նշելով, որ անօդաչու սարքով հարվածը, հնարավոր է, իրականացվել է Ուկրաինայի կողմից՝ որպես պատասխան ԱՄՆ-ի քայլերին ռուսական նավթի հարցում։

Մարտի 14-ին հաղորդվել էր, որ Սալոնիկի նավահանգստից դեպի Նովոռոսիյսկ ուղևորվող Maran Homer նավթատարը ենթարկվել է հարձակման։ Հարվածի պահին նավը դատարկ էր, իսկ անձնակազմում գտնվում էին 24 նավաստի՝ 10 հույն, 13 ֆիլիպինցի և մեկ ռումինացի։ Ավելի վաղ Ուկրաինայի նախագահ Վլադիմիր Զելենսկին քննադատել էր ԱՄՆ-ի որոշումը մեղմել ռուսական նավթի նկատմամբ սահմանված որոշ պատժամիջոցներ՝ նշելով, որ դա կարող է Ռուսաստանի բյուջեն համալրել շուրջ 10 միլիարդ դոլարով։