Տղամարդը 6 ժամ մնացել է MRT-ի սարքի մեջ. Չինաստան

Չինաստանի Ուհան քաղաքում գտնվող հիվանդանոցում մի տղամարդու համար նախատեսված 20 րոպեանոց ՄՌՏ (MRI) հետազոտությունը վերածվել է 6 ժամի։ Բժիշկները հերթափոխի ավարտին մոռացել են հիվանդի մասին և նա 6 ժամ մնացել է սարքի մեջ։ Նրան ազատել են միայն հաջորդ առավոտյան, երբ մաքրուհին լսել է նրա օգնության կանչերը։

Տեղական լրատվամիջոցների տվյալներով Թան ազգանունով տղամարդը գնացել է Ուհանի հիվանդանոց՝ պարանոցի ցավի պատճառով։ Բժիշկները նրան նշանակել են ՄՌՏ հետազոտություն։ Նա պառկել է սեղանին, գլուխը ամրացված է եղել, իսկ դեմքին՝ դիմակ։ Նա կարծել է, որ դա սովորական հետազոտություն է, որը շուտով կավարտվի, սակայն մոտ 30 րոպե անց ինչ-որ բան սխալ է թվացել։ Նա կանչել է. «Ինչու դեռ չի ավարտվում», բայց պատասխան չի ստացել։ Թանը պատմել է, որ այդ պահին ցանկացել է ինքնուրույն դուրս գալ սարքից, բայց չի արել, քանի որ այն դեռ աշխատել է և չի ցանկացել վնասվել։

Նա ամբողջ գիշեր օգնություն է կանչել։ Թանը ազատվել է միայն առավոտյան մոտ ժամը 6-ին, երբ մաքրուհին լսել է նրա օգնության կանչերը և տեղեկացրել անվտանգության աշխատակիցներին։ Ավելի ուշ պարզվել է, որ հիվանդանոցի անվտանգության աշխատակիցները ոստիկանությանը ասել էին, թե Թանը ավարտել է իր հետազոտությունը փետրվարի 26-ին ժամը 12:10-ին՝ հղում անելով գրանցումներին։

Բուժող բժիշկը բացատրել է, որ սխալը տեղի է ունեցել հերթափոխի փոխանցման ժամանակ առաջացած խառնաշփոթի պատճառով։ Նա ասել է, որ Թանին ՄՌՏ սարքի մեջ տեղադրելուց հետո շտապ գնացել է այլ գործերով զբաղվելու։

Մինչ հեռանալը նա գործընկերոջը ասել է, որ Թանը դեռ սարքի մեջ է, սակայն համակարգում նշել է, թե հետազոտությունն արդեն ավարտված է։

Հետագայում գործընկերը չի ստուգել՝ արդյոք սարքի մեջ մարդ կա, և այդ պատճառով Թանը մնացել է այնտեղ։ Բժիշկը նշել է, որ հետազոտությունը պետք է տևեր ընդամենը 20 րոպե։