Կիևին օգնության համար պատասխանատու ամերիկացի գեներալը գնացքում կորցրել է գաղտնի քարտեզներ

Պենտագոնի գլխավոր տեսուչի գրասենյակի կողմից պատրաստված զեկույցի համաձայն՝ Կիև մեկնած ռազմական օգնության խումբը գլխավորած ամերիկացի գեներալ-մայոր Անտոնիո Ագուտոն 2024 թվականին գնացքում գաղտնի քարտեզներ է թողել և Ուկրաինայում գտնվելու ընթացքում շատ է խմել։

Փաստաթղթի համաձայն՝ հետաքննությունը անցկացվել է Ագուտոյի դեմ մի քանի անանուն բողոքներին ի պատասխան, որը 2022-2024 թվականներին ծառայել է որպես Պենտագոնի Ուկրաինայի անվտանգության աջակցության խմբի հրամանատար։ Նա թոշակի է անցել 2024 թվականի օգոստոսին։ Գլխավոր տեսուչի գրասենյակը պարզել է, որ 2024 թվականի մարտի վերջին Ագուտոն և նրա ենթակաները գնացքով մեկնել են Գերմանիայի Վիսբադեն քաղաքից Կիև։

Նրանք իրենց հետ տարել են գաղտնի քարտեզներ։ Ապրիլի սկզբին պարզվել է, որ քարտեզները կորել են ուղևորության ընթացքում։ Մոտ 24 ժամ անց դրանք հանձնվել են Ուկրաինայում ԱՄՆ դեսպանատուն։ Ագուտոն ստանձնել է միջադեպի պատասխանատվությունը։ Հետաքննիչները պարզել են, որ 2024 թվականի մայիսին Ագուտոն Ուկրաինա կատարած ուղևորության ընթացքում ընթրիքի ժամանակ չափից շատ է խմել։

Գլխավոր տեսուչի եզրակացությունների համաձայն՝ Ագուտոն խախտել է մի շարք կանոնակարգեր, որոնք վերաբերում են գաղտնի փաստաթղթերի պահպանմանը և ԱՄՆ զինվորական անձնակազմի վարքագծին։ Սակայն քննիչները չեն գտել որևէ ապացույց, որ Ագուտոն ստեղծել է «անտանելի միջավայր» Ուկրաինային ռազմական օգնության խմբի ներսում, ինչպես պնդվում է նրա դեմ ներկայացված բողոքներից մեկում։ Զեկույցը պատրաստվել է 33 վկաների ցուցմունքների հիման վրա։