Գազի գների կտրուկ աճը սպառնում է Եվրոպային․ կանխատեսվում է լուրջ էներգետիկ ճգնաժամ

Եվրոպայում բնական գազի գների մոտ 40 տոկոս աճը կարող է կործանարար ազդեցություն ունենալ արդյունաբերության և տնային տնտեսությունների վրա։ Այս մասին հայտարարել է Ռուսաստանի ուղիղ ներդրումների հիմնադրամի ղեկավար Կիրիլ Դմիտրիևը՝ արձագանքելով միջազգային շուկաներում ձևավորվող իրավիճակին։

HSBC բանկի վերլուծաբանների գնահատմամբ՝ Մերձավոր Արևելքում լարվածության ֆոնին Եվրոպայում գազի գները կարող են զգալիորեն գերազանցել սպասված մակարդակը։ Դմիտրիևի խոսքով՝ նման պայմաններում եվրոպական տնտեսությունները կբախվեն լուրջ դժվարությունների, իսկ տարածաշրջանին ժամանակ կպահանջվի՝ էներգետիկ պահանջները բավարարելու համար։

Միաժամանակ Goldman Sachs ներդրումային բանկը կանխատեսում է, որ Իրանի կողմից Օրմուզի նեղուցի հնարավոր արգելափակումը կարող է առաջացնել նավթի մատակարարման խոշոր խափանումներ՝ հատկապես ազդելով ավիացիոն վառելիքի և դիզելային վառելիքի շուկաների վրա։ Արդյունքում, համաշխարհային տնտեսությունը կարող է բախվել վառելիքային շոկի, իսկ առավել խոցելի են Ասիա-Խաղաղօվկիանոսյան տարածաշրջանի երկրները, որոնք մեծապես կախված են այդ ուղով իրականացվող ներմուծումներից։