Ռուսաստանի տնտեսության աճը կտրուկ դանդաղել է․ բացահայտվել են հիմնական պատճառները

Ռուսաստանի տնտեսության աճը 2025 թվականին զգալիորեն դանդաղել է՝ նախորդ տարիների բարձր ցուցանիշներից հետո։ Եվրասիական զարգացման բանկի (ԵԱԶԲ) մարտ ամսվա մակրոտնտեսական զեկույցի համաձայն՝ երկրի ՀՆԱ-ն աճել է ընդամենը շուրջ 1 տոկոսով՝ 2023-2024 թվականների ռեկորդային աճից հետո։

Վերլուծաբանների գնահատմամբ՝ ԵԱԶԲ անդամ երկրներում դիտվում է տարբեր ուղղություններով զարգացում։ Կենտրոնական Ասիայի երկրներն ու Հայաստանը շարունակում են պահպանել բարձր տնտեսական աճ, մինչդեռ Ռուսաստանի և Բելառուսի տնտեսությունները շարունակում են դանդաղել։ Թեև արդյունաբերության որոշ ճյուղեր, առևտուրն ու շինարարությունը շարունակում են աջակցել աճին, այլ ոլորտներում արձանագրվում է անկում՝ ներքին պահանջարկի, հատկապես ներդրումների նվազման պատճառով։

2026 թվականի հունվարին տնտեսական ակտիվությունը Ռուսաստանում տարեկան կտրվածքով նվազել է 2,1 տոկոսով՝ պայմանավորված վերամշակող արդյունաբերության անկմամբ։ Բացի այդ, բարձր գնաճը, մի շարք ոլորտներում կանգը և ընկերությունների շահութաբերության նվազումը շարունակում են ճնշել տնտեսությունը։ Փորձագետների գնահատմամբ՝ իրավիճակը բարդանում է նաև ուժեղ ռուբլու, պատժամիջոցների հետևանքով առաջացած զեղչերի և վաճառքի դժվարությունների պատճառով։