Ռուսաստանում քննադատել են ԵՄ-ի որոշումը՝ Ուկրաինային վարկ տրամադրելու վերաբերյալ

Ռուսաստանի Պետդումայի միջազգային հարաբերությունների հանձնաժողովի նախագահի առաջին տեղակալ Ալեքսեյ Չեպան քննադատել է Եվրամիության որոշումը՝ Ուկրաինային շուրջ 90 միլիարդ եվրոյի վարկ տրամադրելու վերաբերյալ։ Նրա մեկնաբանությունը հրապարակել է «Լենտա.ռու»-ն։

Չեպայի կարծիքով՝ նման ֆինանսական աջակցությունը չի նպաստի իրավիճակի կայունացմանը և կարող է հանգեցնել նոր կորուստների։ Նա նաև նշել է, որ դեռևս պարզ չէ՝ կկարողանա՞ արդյոք Ուկրաինան իրականում ստանալ այդ միջոցները՝ հաշվի առնելով նախորդ ձգձգումները և ֆինանսավորման աղբյուրների շուրջ առկա տարաձայնությունները։

Պատգամավորը հավելել է, որ գլոբալ էներգետիկ ճգնաժամը շարունակում է ճնշում գործադրել եվրոպական տնտեսության վրա, իսկ նման որոշումները կարող են ավելի բարդացնել իրավիճակը։ Ավելի վաղ հաղորդվել էր, որ ԵՄ-ն համաձայնեցրել է վարկի տրամադրումը՝ շրջանցելով Հունգարիայի վետոն։