ԲՐԻԿՍ երկրների նավթը մնացել է Մերձավոր Արևելքում․ մատակարարումները կանգ են առել

Հնդկաստանը ձեռք է բերել մեծ ծավալների էներգակիրներ, սակայն չի կարողանում դրանք ստանալ Մերձավոր Արևելքում ստեղծված իրավիճակի պատճառով։ Ինչպես հայտնում է Bloomberg-ը՝ հղում անելով Հնդկաստանի նավագնացության նախարարության ներկայացուցչին, Օրմուզի նեղուցի արգելափակման հետևանքով տանկերներում մնացել է շուրջ 1,67 միլիոն տոննա նավթ։

Նույն իրավիճակում են հայտնվել նաև այլ էներգակիրներ․ մոտ 320 հազար տոննա հեղուկացված նավթային գազ և 200 հազար տոննա հեղուկացված բնական գազ չեն կարողանում հասնել իրենց նպատակակետերին։ Ստեղծված պայմաններում Հնդկաստանի իշխանությունները կոչ են արել գազաբաշխիչ ընկերություններին արագացնել սպառողների միացման գործընթացը՝ մեղմելու էներգետիկ ճնշումը։

Միաժամանակ շարունակվող հակամարտությունը բացասաբար է անդրադառնում երկրի տնտեսության վրա։ Հնդկական ռուփին հասել է պատմական նվազագույն մակարդակի, իսկ նավթի գները աճում են։ Մասնավորապես, ռուսական Urals տեսակի նավթի գինը Հնդկաստանի համար հասել է մոտ 99 դոլարի մեկ բարելի դիմաց։