ԱՄՆ-ի և Իսրայելի հարվածները էկոլոգիական աղետ են ստեղծում Իրանում. Զախարովա

ԱՄՆ-ի և Իսրայելի կողմից Իրանի դեմ իրականացվող արշավը վնասում է շրջակա միջավայրը և ստեղծում է էկոլոգիական աղետ, որը սպառնում է ոչ միայն Իսլամական Հանրապետությանը, այլև շրջակա երկրներին, հայտարարել է Ռուսաստանի արտաքին գործերի նախարարության խոսնակ Մարիա Զախարովան։

«Իրանի դեմ Իսրայելի և ԱՄՆ զինված ուժերի ագրեսիան և էներգետիկ օբյեկտներին հարվածները հանգեցնում են շրջակա միջավայրի աղտոտման», – ասել է Զախարովան ճեպազրույցի ժամանակ։

Նա նաև նշել է, որ Իրանում ռմբակոծությունների հետևանքով ավերված շենքերից առաջացած տոննաներով թափոններն ու բեկորները լուրջ բնապահպանական մարտահրավեր կհանդիսանան առաջիկա տասնամյակների ընթացքում։

«Պայթյունի բեկորների, այրվող նավթի, ոչնչացված ռազմական տեխնիկայի, զինամթերքի, կենցաղային թափոնների, շինարարական աղբի, քիմիական նյութերի, անվադողերի, քայքայվող կենսազանգվածի և կոյուղու շերտը կհանգեցնի աննախադեպ ջերմոցային գազերի արտանետումների, հողի, ստորգետնյա ջրերի և ափամերձ ջրերի աղտոտվածության աճի ոչ միայն Իրանում, այլև ամբողջ տարածաշրջանում», – ընդգծել է Զախարովան։