Կառավարությունն այսօր կհաստատի ԲՈւՀ-երի 2026-2027 ուսումնական տարվա անվճար և վճարովի տեղերը

Կառավարության այսօրվա նիստում չզեկուցվող նախագծերի թվում կընդունվի Հայաստանի Հանրապետության բարձրագույն ուսումնական հաստատությունների 2026-2027 ուսումնական տարվա՝ ըստ մասնագիտությունների պետության կողմից ուսանողական նպաստների ձևով ուսման վարձի լրիվ փոխհատուցմամբ և վճարովի, առկա ուսուցմամբ բակալավրի ու անընդհատ և ինտեգրացված կրթական ծրագրերով ընդունելության տեղերը հաստատելու մասին որոշումը։

Որոշման հիմնավորման մեջ ասվում է.

«Հաշվի առնելով 2025-2026 ընդունելության մրցույթի արդյունքները, թափուր մնացած տեղերի վերլուծությունը՝ նախատեսվում է 2026-2027 ուստարվա համար ըստ մասնագիտությունների առկա ուսուցմամբ բակալավրի ու անընդհատ և ինտեգրացված կրթական ծրագրերով 11 000 վճարովի ընդունելության տեղ, որոնք  կբաշխվեն բուհերի կողմից ներկայացրած հայտերին համապատասխան՝ տվյալ մասնագիտությանը լիցենզիայով հատկացված տեղերի շրջանակում...

Նախագծով ինչպես նախորդ՝ 2025-2026 ուստարվա, այնպես էլ 2026-2027 ուստարվա համար համապատասխան անվճար տեղեր են հատկացվել Երևանի պետական համալսարանի «Ֆիզիկա» (47 տեղ), «Տվյալների մշակումը ֆիզիկայում և արհեստական բանականություն» (15 տեղ) և «Ռադիոֆիզիկա» (47 տեղ) կրթական ծրագրերին: Կադաստրի կոմիտեի առաջարկը հաշվի առնելով՝ Երևանի պետական համալսարանի (պահուստային տեղերի հաշվին) «Աշխարհագրություն» մասնագիտության «054201.02.6 Քարտեզագրություն և կադաստրային գործ» կրթական ծրագրի համար նախորդ տարվա 4 տեղի փոխարեն նախատեսվել է 5 տեղ:

Հայաստանի ազգային պոլիտեխնիկական համալսարանի մասնագիտությունների ցանկում անվճար ներառված՝ «Տեղեկատվական անվտանգություն» (թվանիշ՝ 061901.00.6) և «Ավիացիոն և հրթիռային տեխնիկա» (թվանիշ՝ 071603.00.6) մասնագիտություններին հատկացվել է ընդհանուր  50 տեղ, որից 15-ը «Բլոկչեյն և ՎԵԲ3 տեխնոլոգիաներ», իսկ 10-ը «Ավիատիեզերական ճարտարագիտություն» կրթական ծրագրերին:

Ինչպես նախորդ՝ 2025-2026 ուսումնական տարում, այնպես էլ 2026-2027 ուսումնական տարվա համար Խ.Աբովյանի անվան հայկական պետական մանկավարժական համալսարանում «Մասնագիտական մանկավարժություն» մասնագիտության «Մաթեմատիկա-Ֆիզիկա», «Մաթեմատիկա-Ինֆորմատիկա», «Կենսաբանություն-Քիմիա» «Աշխարհագրություն-Բնագիտություն» կրթական ծրագրերին հատկացվել են 12-ական անվճար տեղեր, «Արհեստ-արվեստ» ծրագրին՝ 1 տեղ, իսկ «Oպերատորություն» և «Ռեժիսուրա» մասնագիտություններին տրամադրվել են 1-ական, «Հատուկ մանկավարժություն» մասնագիտության նոր՝ «Հատուկ մանկավարժություն» կրթական ծրագրին՝ 2, «Էրգոթերապիա» կրթական ծրագրին՝ 1 տեղեր:

2026-2027 ուսումնական տարվա համար Վանաձորի Հ. Թումանյանի անվան պետական համալսարանում «Մասնագիտական մանկավարժություն» մասնագիտության «Ֆիզիկա», «Մաթեմատիկա» և «Քիմիա» կրթական ծրագրերի պետության կողմից ուսման վճարի լրիվ փոխհատուցմամբ տեղերը բաշխվել են «Մաթեմատիկա-Ֆիզիկա» և «Կենսաբանություն-Քիմիա» կրթական ծրագրերին (ընդհանուր՝ 9 տեղ):

Հայաստանի ազգային ագրարային համալսարանին 2026-2027 ուստարվա համար նախատեսվել է անվճար 119 տեղ, նախորդ տարվա 118 տեղի փոխարեն, մասնավորապես, նախորդ ուսումնական տարվա համեմատությամբ 8 տեղ է հատկացվել «Ագրոմեխատրոնիկա և ճշգրիտ ռոբոտատեխնիկա» կրթական ծրագրին, «Պարենամթերքի տեխնոլոգիա» մասնագիտության 32 տեղը բաշխվել է տվյալ մասնագիտության կրթական ծրագրերին՝ «Պարենամթերքի տեխնոլոգիա»՝ 18 տեղ  (նախորդ տարվա 22-ի փոխարեն), «Սննդամթերքի անվտանգություն»՝ 6 տեղ (նախորդ տարվա 5-ի փոխարեն), «Խմորման արտադրության տեխնոլոգիա և գինեգործություն» 8 տեղ։ «Մեքենասարքավորումների ճարտարագիտություն» կրթական ծրագրի համար նախատեսվաում է 7 տեղ (նախորդ տարվա 6-ի փոխարեն), «Ճշգրիտ գյուղատնտեսություն» կրթական ծրագրի համար՝ 5  տեղ (նախորդ տարվա 4-ի փոխարեն)...»: