Աբու Դաբիի ամենամեծ գազային համալիրի գործունեությունը դադարեցվել է հրթիռային հարձակումից հետո

Աբու Դաբիի ամենամեծ բնական գազի վերամշակման համալիրը՝ Հաբշանը, ժամանակավորապես դադարեցրել է գործունեությունը Իրանի հրթիռային հարձակումից հետո, հաղորդում է Reuters-ը՝ հղում անելով Աբու Դաբիի մամուլի կենտրոնին։

Հակաօդային պաշտպանության համակարգը հաջողությամբ որսացել է հրթիռը, սակայն բեկորները ընկել են համալիրի վրա։ Արդյունքում՝ Հաբշանի գործունեությունը ժամանակավորապես դադարեցվել է, մինչ մասնագետները ուսումնասիրում են արդյունաբերական տարածքը և գնահատում են ընկնող բեկորներից պատճառված վնասի չափը։ Անձնակազմի շրջանում վիրավորներ չկան։

ԱՄԷ արտաքին գործերի նախարարությունը դատապարտել է Իրանի հարձակումը գազային համալիրի վրա՝ այն անվանելով ահաբեկչական գործողություն, վտանգավոր էսկալացիա և միջազգային իրավունքի խախտում։ Նախարարությունը շեշտել է, որ կարևորագույն ենթակառուցվածքներին և նավթային օբյեկտներին ուղղված հարվածը անմիջական սպառնալիք է ներկայացնում տարածաշրջանային անվտանգության և կայունության, ինչպես նաև համաշխարհային էներգետիկ անվտանգության համար։

Հայտարարության մեջ ավելացվել է, որ ԱՄԷ-ն իրավունք ունի ձեռնարկել բոլոր անհրաժեշտ միջոցները՝ իր ինքնիշխանությունն ու ազգային անվտանգությունը պաշտպանելու, ինչպես նաև իր ազգային շահերը պաշտպանելու համար։