Իրանի Կարմիր մահիկը շնորհակալություն է հայտնել Ռուսաստանին մարդասիրական օգնության համար

Իրանի Կարմիր մահիկի ընկերության ղեկավար Պիր Հոսեյն Կոլիվանդը շնորհակալություն է հայտնել Ռուսաստանին տրամադրված մարդասիրական օգնության համար՝ նշելով Մոսկվայի կարևոր դերը իրանցիներին դեղորայքով ապահովելու գործում։

«Ռուսաստանի Դաշնությունը նշանակալի դեր է խաղացել դեղորայքի կարիքը բավարարելու գործում՝ ուղարկելով 30 տոննա դեղորայք:

Աջակցության և համերաշխության այս մակարդակը արտացոլում է ժողովուրդների միջև խորը մարդկային, մշակութային և պատմական կապերը դժվարին ժամանակներում», - նրա խոսքերն է մեջբերել Իրանի կառավարության կայքը:

Նա նաև երախտագիտություն է հայտնել Չինաստանի, Թուրքմենստանի, Ուզբեկստանի և Ադրբեջանի կողմից տրամադրված օգնության համար:

Մարտի 12-ին, Ռուսաստանի նախագահ Վլադիմիր Պուտինի հանձնարարականին հետևելով, Ռուսաստանի արտակարգ իրավիճակների նախարարությանը պատկանող Իլ-76 տրանսպորտային ինքնաթիռը Իրանի սահմանին գտնվող Ադրբեջանի Լենքարան քաղաքի օդանավակայան է հասցրել պահանջվող մարդասիրական օգնության առաջին խմբաքանակը՝ ավելի քան 13 տոննա դեղորայք։ Բեռը անմիջապես հանձնվել է Իրանի լիազոր ներկայացուցիչներին։