Եվրոպան իր ոտքին է կրակում՝ հրաժարվելով ռուսական գազից․ Պեսկով

Եվրոպացիները շարունակում են կրակել իրենց ոտքին՝ շարունակելով ռուսական էներգետիկ ռեսուրսներից հրաժարվելու իրենց քաղաքականությունը, հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Եվրոպացիները շարունակում են կրակել իրենց ոտքին, ավելի ճիշտ՝ իրենց ընտրողների», - լրագրողներին ասել է Պեսկովը՝ մեկնաբանելով Եվրահանձնաժողովի նախագահ Ուրսուլա ֆոն դեր Լայենի հայտարարությունը ռուսական գազի գնման վերաբերյալ։

Մերձավոր Արևելքի ճգնաժամի պայմաններում Ռուսաստանից հեղուկացված բնական գազի ներմուծման վերաբերյալ լրագրողների հարցերին պատասխանելով՝ Եվրահանձնաժողովի նախագահը հայտարարել է, որ ԵՄ-ն շարունակելու է հրաժարվել բրածո վառելիքից՝ մաքուր էներգիայի աղբյուրների օգտին։

Սակայն նա չի կրկնել իր ավանդական կատեգորիկ հայտարարությունները, որ ԵՄ-ն ամբողջությամբ պետք է հրաժարվի ռուսական բրածո վառելիքից։