ԵՄ-ն չունի այլընտրանքային տարբերակ` Կիևին 90 միլիարդ եվրոյի վարկ տրամադրելու համար. Լեհաստանի վարչապետ

Եվրոպական միությունը չունի այլընտրանքային տարբերակ՝ Ուկրաինային 90 միլիարդ եվրոյի «ռազմական վարկ» տրամադրելու համար, քանի դեռ Հունգարիան շարունակում է արգելափակել նախաձեռնությունը, հայտարարել է Լեհաստանի վարչապետ Դոնալդ Տուսկը։

Նա ընդգծել է, որ «պլան Բ» գոյություն չունի՝ այդ մասին խոսելով Բրյուսելից մեկնելուց առաջ կայացած մամուլի ասուլիսում՝ ԵՄ գագաթնաժողովից հետո։ Նրա խոսքով, եթե որևէ երկիր, տվյալ դեպքում՝ Հունգարիան, շարունակի արգելափակել միության բյուջեի փոփոխությունները, ապա դա կբերի ցանկալի արդյունքի։

Տուսկը Բուդապեշտի դիրքորոշումը կապել է ապրիլի 12-ին նախատեսված խորհրդարանական ընտրությունների հետ։ Նրա գնահատմամբ՝ ԵՄ-ն մինչև այդ ժամկետը չի կարողանա գործարկել Ուկրաինային ֆինանսական աջակցությունը։

ԵՄ գագաթնաժողովում Հունգարիայի վարչապետ Վիկտոր Օրբանը և Սլովակիայի վարչապետ Ռոբերտ Ֆիցոն արգելափակել են Ուկրաինային 90 միլիարդ եվրոյի «ռազմական վարկ» տրամադրելու և Ռուսաստանի դեմ 20-րդ պատժամիջոցների փաթեթը հաստատելու որոշումը։

Հանդիպման մասնակիցները հայտարարության մեջ նշել են, որ ԵՄ 27 անդամներից 25-ը աջակցել են միջոցառումներին, սակայն դրանց ընդունման համար անհրաժեշտ է եղել միաձայնություն։ Այդ պատճառով Եվրոպական խորհուրդը նախատեսում է հարցին վերադառնալ հաջորդ նիստում։ Այս մասին հայտնում է TASS-ը: