Բռնության ենթարկված փոքրիկի կենսաբանական մայրը 5-րդ երեխային է սպասում

Խորթ մոր կողմից ծեծի ենթարկված 1-ամյա երեխայի կենսաբանական մայրը դեպքի ժամանակ գտնվել է Արարատի մարզի Դարակերտ գյուղում։ Այնտեղ նա ապրում է մոր, եղբոր և մորեղբոր հետ։ Այդ մասին «Փաստինֆո»-ին պատմել է Դարալիկի վարչական ղեկավար Դանիել Պետրոսյանը։ 

«Սոցիալապես անապահով ընտանիք են։ Աղջիկը տարբեր ամուսնություններ է ունեցել։ Վերջին շրջանում՝ 2-3 ամիս, ասում են, որ տեղափոխվել են Դարակերտ, բայց մինչև այդ ապրել է ամուսնու հետ։ Եղբայրը Երևանում է աշխատում, մայրը տարիքով է, չի աշխատում, քեռին տարբեր բանվորական գործեր է անում»,-նշել է նա։

Վարչական ղեկավարի փոխանցմամբ՝ կինը, որը համարվում է Դարակերտի բնակիչ, ունի չորս երեխա։ Զույգ տղաները որդեգրվել են, 4-ամյա աղջիկը գտնվում է ՀՕՖ-ում, իսկ 1-ամյա երեխան՝ «Արաբկիր» բժշկական կենտրոնում։ Նա նաև նշել է, որ կինը այժմ սպասում է իր հինգերորդ երեխային։

Հիշեցնենք՝ մարտի 16-ին «Արաբկիր» բժշկական համալիր էր տեղափոխվել մեկ տարեկան, երկու ամսական երեխա՝ «կլինիկական մահ» ախտորոշմամբ, նրան ծեծի էր ենթարկել խորթ մայրը։