Խոշոր հրդեհ Հարավային Կորեայի ավտոպահեստամասերի գործարանում. զոհվել է 14 մարդ

Հարավկորեացի փրկարարները շաբաթ օրը 14 մարդու աճյուն են դուրս բերել Դեջոն քաղաքի ավտոպահեստամասերի գործարանի այրված բեկորների տակից, որտեղ պայթյունի և հրդեհի հետևանքով առնվազն 59 մարդ է տուժել, հայտնում է Associated Press-ը։

 

Հրշեջ ծառայության ներկայացուցիչները հայտնել են, որ 25 մարդ ստացել է ծանր վնասվածքներ, սակայն դեռևս պարզ չէ՝ արդյոք որևէ մեկի վիճակը կյանքի համար վտանգավոր է, թե ոչ։

 

Ավելի քան 500 հրշեջներ, ոստիկաններ և արտակարգ իրավիճակների ծառայության աշխատակիցներ են ներգրավվել ուրբաթ կեսօրին բռնկված հրդեհի մեկուսացման և փրկարարական աշխատանքների համար։ Գործարանը պատկանում է Anjun Industrial ընկերությանը։

 

Դեդոկ քաղաքային շրջանի հրշեջ ծառայության պետ Նամ Դիկ-Վուն պատմել է, որ կրակը ոչնչացրել է գործարանի շենքը, ուր հրշեջներն սկզբնական շրջանում չէին կարողանում մուտք գործել՝ փլուզման վտանգի պատճառով։

 

Անհետ կորած բանվորների որոնումները սկսվել են ուրբաթ ուշ երեկոյան։ Հրշեջներն անօդաչու հրշեջ-ռոբոտներ են գործի դրել՝ շենքը սառեցնելու համար և անվտանգության ստուգում են իրականացրել։

 

14 զոհվածներից 9-ը հայտնաբերվել են մի սենյակում, որը, ենթադրաբար, եղել է մարզադահլիճ երրորդ հարկում, իսկ երեքը գտնվել են երկրորդ հարկի ջրի բաքի մոտ։ Ներկայումս բոլոր անհետ կորածների գտնվելու վայրը պարզված է։

 

Հարավային Կորեայի նախագահ Լի Չժե Մյոնը շաբաթ օրը կեսօրին այցելել է դեպքի վայր, հանդիպել զոհվածների հարազատների հետ և կոչ արել անվտանգության միջոցներ ձեռնարկել՝ որոնողական աշխատանքների ժամանակ վնասված կառույցի փլուզումը կանխելու համար։

 

Հրդեհի պատճառը դեռևս հայտնի չէ։