95-ամյա Ուխտի օրը. Արամ Ա. Վեհափառը սրբազան մասունքներով կօրհնի հավատացյալներին

22 Մարտ 1931-ին, սուրբ Գրիգոր Լուսաւորիչ հայրապետին մուտն ի վիրապ յիշատակութեան առիթով, երջանկայիշատակ Տ.Տ. Սահակ Բ. Խապայեան կաթողիկոսը հաստատեց Անթիլիասի Ուխտի Օրը։ Ահաւասիկ, 95 տարի անց, այս տարի Ուխտի Օրը կը զուգադիպի նոյնինքն հաստատուած թուականին՝ 22 Մարտին։ Սա լոկ Ուխտի Օր չէ, այլ հրաւէր է յիշելու մեր անցեալը, արժեւորուելու մեր պատմամշակութային արժէքները եւ հաւատարիմ մնալու մեր մայր սուրբ եկեղեցւոյ։

Արդարեւ, Ուրբաթ, 20 Մարտ 2026-ի երեկոյեան ժամը 05։00-ին, հայ եկեղեցւոյ աւանդութեան համաձայն, Անթիլիասի Մայրավանքի Սուրբ Գրիգոր Լուսաւորիչ մայր Տաճարին մէջ տեղի ունեցաւ Երեկոյեան Ժամերգութիւն, որուն աւարտին կատարուեցաւ հայ եկեղեցւոյ հաւատքի հօր՝ Լուսաւորիչ հայրապետին մուտն ի վիրապի յիշատակութեան նախատօնակը։ Իսկ Շաբաթ առաւօտեան, 21 Մարտին, մատուցուեցաւ Սուրբ եւ Անմահ Պատարագ՝ մասնակցութեամբ միաբան հայրերու եւ Դպրեվանքի աշակերտութեան։

Շաբաթ օր, Անթիլիասի Ուխտի Օրուան նախօրեակին, Ն.Ս.Օ.Տ.Տ. Արամ Ա. Վեհափառ Հայրապետը, ուղղուեցաւ Կաթողիկոսարանի «Կիլիկիա» թանգարան, ուրկէ դուրս բերաւ հայ եկեղեցւոյ պատմական ու դարաւոր սրբազան աջեր ու մասունքներ, որոնցմով, Ուխտի Օրը, հայրապետական թափօր պիտի կազմուի եւ պիտի օրհնուին մեր ժողովուրդի զաւակները։