ՄԱԿ-ը նախազգուշացրել է Մերձավոր Արևելքում իրավիճակի սրման պատճառով 45 միլիոն մարդու սովի վտանգի մասին

Մերձավոր Արևելքում ստեղծված իրավիճակի պատճառով աղքատ երկրների համար նախատեսված տասնյակ հազարավոր տոննա պարենային օգնությունը կասեցվել է: ՄԱԿ-ի Համաշխարհային պարենային ծրագիրը (WFP) զգուշացրել է, որ եթե խափանումները շարունակվեն, միլիոնավոր մարդիկ կարող են սովի մատնվել, հաղորդում է Financial Times (FT)-ը։

WFP-ի մատակարարման շղթաների տնօրեն Կորին Ֆլեյշերի խոսքով՝ մոտ 70,000 տոննա սնունդ մնացել է ծովում՝ լոգիստիկ խափանումների և վերաուղղորդման պատճառով: Կազմակերպությունը նշել է, որ եթե մատակարարման խափանումները շարունակվեն մինչև հունիս, ամբողջ աշխարհում սուր պարենային պակասի առջև կանգնած մարդկանց թիվը կարող է աճել 45 միլիոնով։

Խափանումները, մասնավորապես, վերաբերում են տարաներով տեղափոխվող մոտ 30,000 տոննա սննդին: Սա ներառում է պահածոյացված մթերքներ, ոլոռ և հատուկ սննդային ապրանքներ: