Պուտինը խոստում է տվել Կիմ Չեն Ընին

Ռուսաստանի նախագահ Վլադիմիր Պուտինը շնորհավորել է Կիմ Չեն Ընին՝ ԿԺԴՀ բարձրագույն պետական պաշտոնում վերընտրվելու առթիվ՝ խոստանալով շարունակել և զարգացնել երկկողմ ռազմավարական գործընկերությունը։ Համապատասխան ուղերձը հրապարակվել է Կրեմլի պաշտոնական կայքում։

Պուտինը ընդգծել է, որ Ռուսաստանում բարձր են գնահատում Կիմ Չեն Ընի անձնական ներդրումը երկու երկրների միջև դաշնակցային և բարեկամական հարաբերությունների ամրապնդման գործում։ Նրա խոսքով՝ Մոսկվան պատրաստ է շարունակել սերտ համագործակցությունը՝ խորացնելու համապարփակ ռազմավարական գործընկերությունը Ռուսաստանի և Փհենյանի միջև։

Ռուսաստանի նախագահը նաև նշել է, որ Կիմ Չեն Ընի վերընտրությունը ԿԺԴՀ պետական գործերի նախագահի պաշտոնում վկայում է նրա քաղաքական կուրսի նկատմամբ լայն հասարակական աջակցությունը։ Նշվում է, որ ավելի վաղ՝ հունվարին, հյուսիսկորեացի առաջնորդը նամակ էր հղել Պուտինին՝ ընդգծելով երկու երկրների ղեկավարների միջև ձևավորված «արժեքավոր բարեկամական հարաբերությունները»։