Չինական բորսաները փլուզվել են․ շուկաները կտրուկ արձագանքել են աշխարհաքաղաքական լարվածությանը

Շանհայի և Շենչժենի ֆոնդային բորսաները գրանցել են 2026 թվականի սկզբից ամենախոշոր անկումը՝ նվազելով մոտ 4 տոկոսով։ Այս մասին հայտնում է ՏԱՍՍ-ը՝ հղում անելով առևտրային տվյալներին։

Հաղորդվում է, որ Shanghai Composite ինդեքսը նվազել է մինչև 3813,28 կետ՝ կորցնելով 3,63%, իսկ Shenzhen Component-ը՝ մինչև 13 345,51 կետ՝ 3,76% անկումով։ Շուկայի անկումը պայմանավորված է հիմնականում աշխարհաքաղաքական լարվածությամբ, հատկապես ԱՄՆ նախագահ Դոնալդ Տրամփի սպառնալիքներով՝ հարվածներ հասցնել Իրանի էներգետիկ օբյեկտներին, եթե Թեհրանը չդադարեցնի Հորմուզի նեղուցով հումքի փոխադրման խոչընդոտումը։

Նշվում է, որ տարածաշրջանի այլ շուկաները նույնպես արձագանքել են՝ գրանցելով մոտ 5% անկում՝ Մերձավոր Արևելքից մատակարարումների կախվածության պատճառով։ Միևնույն ժամանակ, ներդրողների միջոցների պակասի ֆոնին ոսկու գինը նույնպես կտրուկ նվազել է՝ գրանցելով 1983 թվականից ի վեր ամենախորը շաբաթական անկումը։