ՆԱՏՕ-ն Ռումինիայում սկսել է Sea Shield 2026 զորավարժությունները

Ռումինիայում մեկնարկել են ՆԱՏՕ-ի «Sea Shield 2026» զորավարժությունները, հաղորդում է Agerpres գործակալությունը։ Բացման արարողությանը մասնակցել է Ռումինիայի պաշտպանության նախարար Ռադու Միրուցան, որը տեղի է ունեցել Կոնստանցա նավահանգստում։

Ռումինիայի ռազմածովային ուժերի կողմից կազմակերպված զորավարժությունները կանցկացվեն մարտի 23-ից մինչև ապրիլի 3-ը՝ ընդգրկելով ծովային, գետային, ստորջրյա, ցամաքային և օդային միջավայրեր։

Զորավարժություններին ներգրավված են շուրջ 2,500 զինծառայողներ ՆԱՏՕ-ի 13 երկրներից՝ Բուլղարիա, Գերմանիա, Հունաստան, Իսպանիա, Իտալիա, Կանադա, Նիդեռլանդներ, Լեհաստան, Պորտուգալիա, Ռումինիա, ԱՄՆ, Թուրքիա և Ֆրանսիա։ Կիրառվելու են 48 նավ, 64 մարտական մեքենա, 10 ինքնաթիռ և 10 անօդաչու թռչող սարք։

Ռումինիայի ռազմածովային ուժերը ներկայացված են մոտ 1,500 անձնակազմով, 33 ծովային և գետային նավերով (ներառյալ երեք ֆրեգատ), 14 մարտական մեքենայով, չորս անօդաչու թռչող սարքով և երկու նավային ուղղաթիռով։

Ռումինիայի պաշտպանության նախարարության տվյալներով՝ զորավարժությունների ընթացքում կիրականացվեն բարդ սցենարներ, որոնք հարմարեցված են արդի անվտանգության մարտահրավերներին։ Դրանց նպատակն է բարձրացնել մասնակից կառույցների միջև փոխգործակցության մակարդակը, ինչպես նաև օպտիմալացնել ազգային պաշտպանության համակարգի, հասարակական կարգի և ազգային անվտանգության բոլոր հաստատությունների գործողությունները։ Այս մասին հայտնում է TASS-ը: