ԱՄՆ և Իրանի բանակցողների հանդիպումը կարող է կազմակերպվել այս շաբաթվա վերջում. N12

ԱՄՆ-ի և Իրանի ներկայացուցիչների միջև հանդիպումը կարող է կայանալ այս շաբաթվա վերջում Պակիստանի մայրաքաղաք Իսլամաբադում, հաղորդում է N12 հեռուստաալիքը՝ հղում անելով իսրայելական պաշտոնյայի։

Ըստ պաշտոնյայի՝ Վաշինգտոնը դիտարկում է ԱՄՆ փոխնախագահ Ջեյ Դի Վենսին նշանակել որպես գլխավոր բանակցող հնարավոր բանակցություններում։ Բացի այդ, բանակցություններին մոտ կանգնած աղբյուրը N12-ին հայտնել է, որ Վաշինգտոնի և Թեհրանի միջև հեռախոսազրույց է նախատեսված մարտի 23-ին, որը «կլինի վճռորոշ հետագա բանակցությունների համար»։

Հեռուստաալիքը ավելի վաղ, հղում անելով բարձրաստիճան իսրայելական պաշտոնյայի, հաղորդել էր, որ Վաշինգտոնը կապի մեջ է Իրանի խորհրդարանի խոսնակ Մոհամմադ Բաղեր Ղալիբաֆի հետ։ Աղբյուրի խոսքով՝ Իսրայելը տեղյակ էր, որ մի շարք երկրներ միջնորդական ջանքեր են գործադրում Իրանի և ԱՄՆ-ի միջև բանակցություններ կազմակերպելու համար, սակայն իսրայելական կողմը զարմացել է, երբ ԱՄՆ նախագահ Դոնալդ Թրամփը հայտարարել է, որ այդ շփումները արդյունք են տալիս։

Ավելի վաղ ԱՄՆ նախագահ Դոնալդ Թրամփը Truth Social հարթակում գրել էր, որ վերջին օրերին Վաշինգտոնն ու Թեհրանը վարել են «շատ լավ և արդյունավետ քննարկումներ» Մերձավոր Արևելքում ռազմական գործողությունները դադարեցնելու վերաբերյալ։ Նա նաև հայտնել է, որ Պենտագոնին հանձնարարել է հինգ օրով հետաձգել Իրանի էներգետիկ ենթակառուցվածքների վրա հարվածները։ Բացի այդ, ԱՄՆ առաջնորդը լրագրողներին ասել է, որ թե՛ ԱՄՆ-ը, թե՛ Իրանը ցանկանում են համաձայնության գալ և ունեն «խոշոր համընկնող կետեր»։

Մինչդեռ իրանական Tasnim գործակալությունը, հղում անելով աղբյուրին, հայտնել է, որ Թեհրանը չի վարել և չի վարում բանակցություններ Վաշինգտոնի հետ։ Գործակալության տվյալներով՝ ԱՄՆ առաջնորդը որոշել է չհարվածել Իրանի ենթակառուցվածքներին, քանի որ «Իրանի ռազմական սպառնալիքները դարձել են ավելի համոզիչ»։ Այս մասին հայտնում է TASS-ը: