Կոլումբիայում ինքնաթիռ է կործանվել, որում եղել է 125 մարդ

Կոլումբիայում կործանված C-130 «Hercules» ռազմատրանսպորտային ինքնաթիռում եղել է 125 մարդ, նրանցից առնվազն 48 տուժած տարհանվել են:

Այս մասին հայտնում է ՌԻԱ Նովոստին՝ վկայակոչելով Կոլումբիայի օդատիեզերական ուժերի հրամանատար, գեներալ Կառլոս Ֆերնանդո Սիլվա Ռուեդային։

«Այս պահի դրությամբ հաստատված է տեղեկությունը, որ օդանավում եղել է 114 ուղևոր և անձնակազմի 11 անդամ։ Ներկայում հայտնի է 48 տուժածների մասին, որոնք արդեն տարհանվել են։ Նրանք բոլորը գտնվում են Պուերտո Լեգիսամոյի բժշկական հաստատություններում»,- հայտարարել է Սիլվան։

Կոլումբիայի բանակի ինքնաթիռը վթարի է ենթարկվել այսօր՝ Պուտումայո դեպարտամենտի Պուերտո Լեգիսամոյից թռիչքի ժամանակ:

Գեներալի խոսքով՝ վթարը տեղի է ունեցել օդ բարձրանալուց անմիջապես հետո. դեպի Պուերտո Ասիս չվերթն իրականացնող ինքնաթիռն ընկել է օդանավակայանից մոտ մի քանի կիլոմետր հեռավորության վրա:

Տուժածներին տարհանելու համար օդանավակայան են ուղարկվել ռեանիմոբիլներ, այդ թվում՝ C-130, որն ունի մինչև 50 վիրավոր տեղափոխելու հնարավորություն։ Փրկարարական գործողությանը մասնակցել է նաև UH-60 բժշկական ուղղաթիռը:

Աղետի պատճառներն առայժմ հայտնի չեն։