Ինձ մոտ երբեք այն միտքը չի եղել, որ սա վերջն է, շատ ծանր է, բայց պետք չէ ընկճվել. Հրանտ Թոխատյանը՝ հիվանդության ու բուժման մասին

«Այն, ինչ որ ես այսօր ինձնից ներկայացնում եմ, այնպես, ինչպես զգում եմ ինձ հիմա, իմ առողջական վիճակը, դա իմ երեխաների շնորհիվ է։ Այն, ինչ իրենք արեցին այս 2,5-3 տարվա ընթացքում... Իրենք ինձ ոտքի կանգնեցրեցին»,- Tete A Tete  հաղորդման ժամանակ ասել է ՀՀ ժողովրդական արտիստ Հրանտ Թոխատյանը։

Նա նախ շնորհակալություն է հայտնել բոլոր բժիշկներին, նաև նշել է, որ իր տղաները, դուստրը, թողել են ամեն ինչ, իրենց գործերն ու իր հետ գնացել ԱՄՆ՝ բուժման ընթացքում իր հետ լինելու համար։

«Հազում էի, արյուն էր գալիս, գնացել էի թոքերս ստուգելու։ Ինձ թվում էր՝ ձայնալարերից է։ Բայց բժիշկները, որոնք ԿՏ արեցին, իրենց ռեակցիայից հասկացա, որ մի բան այն չէ, ասացին՝ անպայման գնամ թոքի մասնագետի մոտ։ Բայց ժամանակ չկար, շտապում էի բեմ։

Սիրտս էլ ստուգեցին, քանի որ վիրահատությունը ծանր էր լինելու։ Ստուգեցին, պարզվեց՝ ստենտեր է պետք դնել, ընդ որում 3 հատ։

ԱՄՆ-ում բժիշկս հնդիկ էր, կենսագրությունս կարդացել էր, հարցրեց՝ դերասա՞ն ես, ասացի՝ այո։ Ասացի՝ լսել եմ այդ քիմիայից մազաթափություն է  լինում, կարճ եմ մնալու, գնալու եմ՝ բեմ բարձրանամ։ Ժպտաց ու ասաց՝ ես այդ քիմիայի դեղերից  մեկը կփոխեմ, մազաթափություն չի լինի, հանգիստ եղիր, բայց մի շտապիր, դեռ մնա այստեղ։ Մոտ 1 տարի մնացի բուժման»,- հիվանդության մասին հակիրճ  պատմել է դերասանը։ 

Նա նշել է՝ իր մոտ մոտ երբեք այն միտքը չի եղել, որ սա վերջն է, որ՝ վերջ, գնում է, հրաժեշտ տա, միշտ հավատը կար, գիտեր, որ ամեն ինչ լավ է լինելու։

«Աստված չանի, բայց ով որ հանդիպի դրան, խորհուրդս է՝ երբեք չընկճվել, դա շատ ծանր է, բայց պետք է չընկճվել, նայիր երեխաներիդ աչքերիդ, նայիր ու դա քեզ կլավացնի կրկնակի անգամ ավելի շատ, քան չնայես, նայիր կնոջդ, ընկերներիդ աչքերին։ Ինձ մոտ երբեք ոչ ոք չի արտասվել։ Լուիզան ասում էր, որ դուրս են գալիս, արտասվում են, բայց  ինձ մոտ երբեք որևէ մեկը հուսահատված չի մտել»,- ասել է Հրանտ Թոխատյանը։

Նա պատմել է, որ իրեն շատ օգնել է կինը՝ դերասանուհի Լուիզա Ներսիսյանը. «Երբեք ընկճված չեմ տեսել, իր աչքերում իմ մոտ արցունքներ չեմ տեսել, չնայած դուստրս ասում էր, որ անընդհատ լացում էր։ Լուիզան ամեն ինչ արեց, ավելին՝ և Լուզիան, 90 տոկոսն իրենն է, և Իռան, և Արուսյակը»։

Հարցին՝ ինչպե՞ս է ստացվել նախկին բոլոր կանայք, ներկայիս կինը, բոլորը իրեն շատ սիրուն են, բոլորը մեկը մյուսին սիրում է, Հրանտ Թոխատյանը պատասխանել է. «Որովհետև ես եմ իրենց շատ սիրում, շատ-շատ եմ սիրում, դա անբացատրելի է։ Վստահ եմ՝ շատերն ասել են, կասեն ... բազմակնություն։ Այդպես ստացվել է, բայց իրենք ամեն մեկն ինձ համար թանկ է, շատ թանկ, շատ եմ մտածում իրենց մասին, իմ հնարավորությունների չափ հոգ եմ տանում իրենց մասին, ուզում եմ իրենց մոտ ամեն ինչ լինի շատ լավ լինի։  Կարևորը՝ երբեք մեկից մյուսի մոտ չեմ գնացել։ Դա է պատճառներից մեկը, որ իրենք իրար հետ լավ են։ Դա ձևական չէ, իսկապես լավ են, դա է պատճառը, որ երեխաներս  հարազատորեն են իրար վերաբերվում»։