ՄԱԿ. Հորմուզի նեղուցի փակումը կվատթարացնի Սուդանում, Աֆղանստանում և Եմենում սովը

ՄԱԿ-ի Ծրագրային ծառայությունների գրասենյակի գործադիր տնօրեն Խորխե Մորեյրա դա Սիլվայի խոսքով՝ Հորմուզի նեղուցի փակումը կվատթարացնի սովից տառապող երկրների, այդ թվում՝ Սուդանի, Հարավային Սուդանի, Աֆղանստանի, Եմենի և Սոմալիայի իրավիճակը։

Նրա խոսքով՝ Մերձավոր Արևելքում լարվածության սրման հետևանքները «հոսում են հակամարտությունից տուժած երկրների սահմաններից շատ ավելի հեռու»։ Մասնագետը կարծում է, որ Հորմուզի նեղուցի փակման ամենալուրջ հետևանքները կզգան Ասիայի և Աֆրիկայի զարգացող երկրները։

«Հորմուզի նեղուցի խափանումները սպառնում են էներգամատակարարմանը։ Սա ազդում է պարարտանյութերի շուկայի վրա՝ սպառնալով սննդի անվտանգությանը այն երկրներում, որտեղ սովը կամ սննդի անապահովությունը ամենաբարձրն է, այդ թվում՝ Սուդանի, Հարավային Սուդանի, Աֆղանստանի, Եմենի և Սոմալիայի», - նրա խոսքերը մեջբերել է ՄԱԿ-ի մամուլի ծառայությունը։

Դա Սիլվան գնահատում է, որ աշխարհում սովից տառապող մարդկանց թիվը մեկ տարվա ընթացքում կաճի տասնյակ միլիոններով։ «Ծոցի պատերազմի սրացումը կարող է նաև սպառնալ դրամական փոխանցումների հոսքին, մասնավորապես՝ Հարավային Ասիա», - հավելել է նա։