ՀԷՑ-ը լույս չի տալիս, պետռեգիստրը՝ չի զգուշացնում․ քաղաքացիները օրերով չեն սպասարկվում

 Հայաստանի միակ պետական ռեգիստրի գործակալության շենքը հոսանքազրկված է 3 օր շարունակ, խայտառակ կուտակումներ են ու բացակա պատասխանատվություն՝ սպասարկման սպասող քաղաքացիներ նկատմամբ: Euromedia24 ահազանգած քաղաքացիները վրդովված պատմում են, որ 3-րդ անգամն է առավոտյան մոտենում են շենքին, իրենց գործարքների համար իրենց հերթի սպասման գրանցումն անում ու հանկարծ լույսերն անջատվում են… չկա բացատրություն:

Ժամերով սպասող հերթերին միայն աշխատակիցներն են կես բերան հուսադրում , թե հերթական հովհարային անջատում է, երևի շուտով կմիացնեն, բայց 17:00-ին է միանում լույսերը, պատմում են մեզ դիմած մարդիկ:

«3 օր անելանելի վիճակում ենք : Կարծես դիտմամբ անեն, աշխատանքային օրվա ավարտին հազիվ մի քանի հոգի է հասցնում սպասարկվել, սենց ինչքա՞ն կշարունակվի, ոչ ոք չգիտի»,– վրդովված պատմում է մեկ այլ քաղաքացի, ով չի կարողանում դրսից ժամանած որդու հետ իր անվամբ պլանավորած ՍՊԸ-ն գրանցել, ասում է ՝ բիզնեսում ուշացող հարցեր կան, անհնար է սպասել:

Մեկ ուրիշ հայրենակից էլ հումորով նախատում է ՀԷՑ-ի նոր սեփականատերը դարձած ՀՀ կառավարությանը՝ թե բա «Երևի վերևներում մրցակցությունից են վախենում, թույլ չեն տալիս կուսակցությունս գրանցեմ, որ առաջադրվեմ հունիսի 7-ին կայանալիք ԱԺ ընտրություններին ու չկարողանամ կրել իրենց»:

Կարճ ասած՝ սա մի իրավիճակ է, որն ունի տեր, բայց անտերություն է Պետռեգիստրում: Ստեղծված իրավիճակում թերևս կարելի էր արդարանալ գոնե հաջորդիվ եկողներին իրազեկելով, որ չկա հոսանք չի լինի գործարք, բայց զլացել են անգամ կազմակերպչական խնդիրը լուծել: Ընդգծենք, նաև ՀԷՑ-ից ևս չեն ապահովել քաղաքացիների պատշաճ իրազեկում , որպեսզի մարդիկ բան ու գործ թողած՝ չգնան հետո նոր պարզեն , որ հնարավոր չէ սպասարկվել Պետռեգիստրում: Իսկ հերթերն այս ընթացքում կուտակվում ու կուտակվում են՝ մինչև երբ՝ Աստծուն ու ՀԷՑ կառավարիչ Ռոմանոս Պետրոսյանին են հայտնի:

Մարինե Առաքելյան