«Հեզբոլլահը» դատապարտել է Լիբանանից Իրանի դեսպանի արտաքսումը

«Հեզբոլլահ» շարժումը դատապարտել է Լիբանանի արտաքին գործերի նախարարության որոշումը՝ Իրանի դեսպան Մոհամմադ Ռեզա Շեյբանիին անցանկալի անձ հայտարարելու վերաբերյալ, հայտնում է AL-JAZEERA-ն։

Կազմակերպությունը հայտարարության մեջ նշել է, որ «մերժում է» այդ որոշումը՝ այն որակելով «անխոհեմ և դատապարտելի»։ Նշվում է, որ այս քայլը կարելի է գնահատել որպես «հեղաշրջում» և այն հանդիսանում է Լիբանանի կառավարության կողմից օտարերկրյա կենտրոնների ճնշմանը ենթարկվելու հետևանք։

«Այն թույլ հիմնավորումները, որոնց վրա հիմնվել է այս կամայական որոշումը՝ դեսպանին մեղադրելով Լիբանանի ներքին գործերին միջամտելու մեջ, ընդամենը հաստատում են, որ սա բացարձակապես քաղաքական որոշում է՝ զուրկ նվազագույն խոհեմությունից և ազգային պատասխանատվությունից», — ասված է «Հեզբոլլահի» Telegram-ում հրապարակված հայտարարության մեջ։

Կազմակերպությունը նաև նշել է, որ Լիբանանի իշխանությունները պետք է միավորեն քաղաքացիներին՝ երկրի նկատմամբ Իսրայելի ագրեսիային դիմակայելու համար այս «չափազանց վտանգավոր ժամանակահատվածում»։

Ավելի վաղ Լիբանանը դադարեցրել էր Շեյբանիի հավատարմագրումը և պահանջել, որ նա լքի երկիրը մինչև կիրակի։