Եվրոպան փաստացի պատրաստվում է պատերազմի Ռուսաստանի դեմ. Ռուսական պատվիրակություն

Վիեննայում զինաթափման բանակցություններում Ռուսաստանի պատվիրակության ղեկավար Յուլիա Ժդանովան հայտարարել է, որ Եվրոպան փաստացի պատրաստվում է լայնածավալ պատերազմի Ռուսաստանի դեմ։

Նրա խոսքով՝ տարբեր երկրների, այդ թվում՝ Մեծ Բրիտանիայի, Կանադայի և ԵՄ պետությունների ներկայացրած քայլերը, որոնք նրանք բնութագրում են որպես «թափանցիկ և օրինական», իրականում ձևավորում են մտահոգիչ պատկեր․ «Եվրոպան պատրաստվում է պատերազմի»։

Ժդանովան նշել է, որ ՆԱՏՕ-ի և ԵՄ երկրների կողմից դիտարկվող միտումները վկայում են հնարավոր ուղղակի զինված հակամարտության նախապատրաստման մասին առաջիկա տարիներին։ Նրա խոսքով՝ դա արտահայտվում է ռազմական պլանավորման և զորավարժությունների աճով, ռազմական ծախսերի աննախադեպ բարձրացմամբ, եվրոպական տնտեսությունների ռազմականացմամբ և հանրային կարծիքի նպատակային ձևավորմամբ։

Նա նաև հավելել է, որ Կիևի իշխանությունները, պատրաստակամ լինելով երկարաձգել հակամարտությունը, օգտագործվում են ժամանակ շահելու և ռազմական կարողությունները մեծացնելու նպատակով, իսկ Ֆրանսիան, ըստ նրա, առաջնորդում է այսպես կոչված «կամավորների կոալիցիան» Ռուսաստանի դեմ հակադրության հարցում, հայտնում է TASS-ը։