Մամուլի ասուլիս՝ նվիրված սիմֆոնիկ նվագախմբի 20-ամյակին․ քննարկվել են հոբելյանական ծրագրերն ու Լանգ Լանգի համերգը

Հայաստանի պետական սիմֆոնիկ նվագախմբի հիմնադրման 20-ամյակին նվիրված՝ այսօր տեղի է ունեցել մամուլի ասուլիս, որի շրջանակում բանախոսներն անդրադարձել են նվագախմբի հոբելյանական տարվա միջոցառումներին և իրադարձություններին, ինչպես նաև ապրիլի 14-ին կայանալիք աշխարհահռչակ դաշնակահար Լանգ Լանգի համերգին:

Բանախոսներն էին ԿԳՄՍ նախարարի տեղակալ Դանիել Դանիելյանը, Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, նվագախմբի տնօրեն Սարգիս Բալբաբյանը։

Դանիել Դանիելյանը նշել է, որ Հայաստանի պետական սիմֆոնիկ նվագախումբը Հայաստանի լավագույն կառույցներից է և մեծ դերակատարում ունի հայաստանյան երաժշտական կյանքում և հանրության գեղագիտական ճաշակի զարգացման գործում:

«Տարիներ ի վեր Հայաստանի պետական սիմֆոնիկ նվագախումբն ամբողջ աշխարհում հավուր պատշաճի ներկայացնում է հայաստանյան կատարողական և դասական արվեստը: Նվագախումբը 20 տարի շարունակ համերգներով հանդես է եկել Հայաստանում և աշխարհի բազմաթիվ երկրներում: Պետության վերջին տարիների վարած քաղաքականության և ներդրումների շնորհիվ հայաստանյան հեղինակավոր նվագախմբերը համերգներով մշտապես հանդես են գալիս նաև մարզերում»,- ասել է նախարարի տեղակալը՝ ընդգծելով, որ Լանգ Լանգի համերգի իրականացման համար պետությունը մեծ ֆինանսական աջակցություն է հատկացրել: Այս մասին հայտնում է ՀՀ ԿԳՄՍ նախարարությունը: