Ամերիկյան Abrams-ները անհետանում են ճակատից․ դռոնները փոխում են պատերազմի կանոնները

Ուկրաինական ուժերը գրեթե ամբողջությամբ դուրս են բերել ամերիկյան M1 Abrams տանկերը առաջնագծից՝ ռուսական անօդաչու սարքերի սպառնալիքի պատճառով։ Այս մասին գրում է 19FortyFive-ը՝ բացատրելով, որ այս տեխնիկան այլևս արդյունավետ չէ ժամանակակից մարտադաշտում։

Հոդվածի հեղինակ Բրենդոն Վայխերտի խոսքով՝ Abrams-ը չափազանց հնացած է նոր պատերազմի պայմանների համար։ Նա հիշեցնում է, որ այս տանկերը հաջողություն են ունեցել Պարսից ծոցի պատերազմի ժամանակ՝ օդային գերակայության պայմաններում, սակայն այսօր նման աջակցություն չկա։ Բացի այդ, նույնիսկ նախկինում տանկերը նախատեսված չէին գործելու ինքնուրույն՝ առանց այլ զորատեսակների աջակցության։

Նյութում ընդգծվում է, որ Abrams-ի հիմնական խոցելիությունը դարձել են ռուսական «կամիկաձե» դռոնները, որոնք հարվածում են տանկի ամենաթույլ հատվածներին՝ աշտարակի և կորպուսի վերևից։ Այս ֆոնին փորձագետները նշում են, որ անօդաչուների գերակայության պայմաններում դասական տանկերը կորցնում են իրենց արդյունավետությունը՝ ստիպելով վերանայել ռազմական ռազմավարությունը։