Փոքր բիզնեսի զանգվածային փակումների վտանգ․ մինչև 30% կարող է անհետանալ շուկայից

Ռուսաստանում մոտակա տարիներին փոքր բիզնեսի մինչև 30 տոկոսը կարող է փակվել։ Այս կանխատեսումն է ներկայացրել տնտեսագետ Նիկոլայ Կուլբական՝ նշելով, որ իրավիճակը կտրուկ վատթարացել է աճող ճնշումների և ֆինանսական բեռի պայմաններում։

Փորձագետի խոսքով՝ փոքր և միջին բիզնեսի վրա զգալիորեն ավելացել է հարկային ծանրաբեռնվածությունը, հատկապես ավելացված արժեքի հարկի (ԱԱՀ) բարձրացման և դրա կիրառման շեմի կրճատման պատճառով։ 2026 թվականից ԱԱՀ-ն բարձրացվել է մինչև 22 տոկոս, իսկ դրա վճարման շեմը նվազեցվել է 60 միլիոնից մինչև 20 միլիոն ռուբլի, իսկ ապագայում նախատեսվում է այն ևս նվազեցնել։ Այս փոփոխությունները արդեն ստիպել են մի շարք ընկերությունների բարձրացնել ծառայությունների գները՝ գոյատևելու համար։

Կուլբակայի գնահատմամբ՝ ստեղծված իրավիճակում փոքր բիզնեսի համար հիմնական «փրկության» տարբերակը դառնում է ստվերային տնտեսություն տեղափոխվելը։ Միևնույն ժամանակ, բիզնես միջավայրում աճում են անհանգստությունները․ հարցումները ցույց են տալիս, որ ընկերությունների մեծ մասը 2026-ի սկզբին արձանագրել է շուկայի պայմանների վատթարացում՝ համեմատած նախորդ տարվա հետ։