Անապայի լողափերը պատրաստվում են վերաբացման․ մինչև հունիսի 1-ը խոստանում են ամբողջությամբ մաքրել նավթային աղտոտումը

Ռուսաստանի փոխվարչապետ Վիտալի Սավելևը հայտարարել է, որ Անապայի բոլոր լողափերը նախատեսվում է բացել մինչև հունիսի 1-ը։ Նրա խոսքով՝ ներկայումս լողափերում մնացել է նավթամթերքների ընդամենը մոտ 10 տոկոսը, և մաքրման աշխատանքները շարունակվում են ակտիվ տեմպերով։

Պաշտոնյայի գնահատմամբ՝ ծովի ջուրն արդեն իսկ հարմար է լողալու համար, և հանգստացողների համար վտանգ չի ներկայացնում։ Սա թույլ է տալիս ակնկալել, որ զբոսաշրջային սեզոնը կբացվի ըստ նախատեսված ժամանակացույցի։

Ավելի վաղ Ռոսպոտրեբնադզորի ղեկավար Աննա Պոպովան նշել էր, որ Անապայի և Կրասնոդարի երկրամասի Թեմրյուկի շրջանի լողափերը դեռևս պատրաստ չեն ընդունել զբոսաշրջիկների՝ ավազում նավթամթերքների բարձր պարունակության պատճառով։ Սակայն, ըստ նրա, մինչև ամառ ժամանակ կա իրավիճակը կարգավորելու համար։