Ռուսաստանում առաջարկել են ընդլայնել ռազմական գործողությունների գոտին՝ ներառելով ՆԱՏՕ-ի երկրները

Ռուսաստանցի ռազմական բլոգեր Միխայիլ Զվինչուկը հայտարարել է, որ «հատուկ ռազմական գործողության» գոտին կարելի է ընդլայնել՝ ներառելով նաև ՆԱՏՕ-ի անդամ երկրների տարածքները։ Նրա խոսքով՝ նման քայլը կարող է փոխել գործողությունների տրամաբանությունը և բարձրացնել էսկալացիայի մակարդակը։

Զվինչուկը նշել է, որ ուկրաինական անօդաչու սարքերը, որոնք հարվածել են Լենինգրադի մարզին, հնարավոր է անցել են Ռուսաստանի սահմանակից Բալթյան երկրների տարածքով։ Նա առաջարկել է նույն մեթոդը կիրառել հակառակ ուղղությամբ՝ այդ երկրների տարածքով հարվածներ հասցնելով Ուկրաինային՝ «անսպասելի ուղղություններից»։

Միաժամանակ, բլոգերը ենթադրել է, որ ՆԱՏՕ-ն կարող է չկիրառել իր կանոնադրության հինգերորդ հոդվածը, ըստ որի դաշինքի որևէ երկրի վրա հարձակումը համարվում է հարձակում բոլորի դեմ։ Ավելի վաղ հաղորդվել էր, որ Լատվիան, Լիտվան և Էստոնիան թույլ են տվել ուկրաինական դրոնների թռիչքը իրենց տարածքով, ինչի հետևանքով հարվածներ են հասցվել ռուսական նավթային նավահանգիստներին, որտեղ գրանցվել են հրդեհներ։