Թաիլանդը բանակցություններ է վարել Իրանի հետ Հորմուզի նեղուցով նավթի փոխադրման վերաբերյալ

Բանգկոկը բանակցություններ է վարել Թեհրանի հետ Հորմուզի նեղուցով նավթի փոխադրման անվտանգ երթուղու պահպանման վերաբերյալ, հայտարարել է Թաիլանդի վարչապետ Անութին Չանվիրակունը «Գլոբալ ճգնաժամի մեկ ամիսը. Թաիլանդի արձագանքը փոփոխված աշխարհում» խորագրով մամուլի ասուլիսում։

Նրա խոսքով՝ «կառավարությունը ակտիվացրել է ջանքերը Թաիլանդի էներգետիկ անվտանգությունն ամրապնդելու ուղղությամբ, և հիմնական գործոններից մեկը Իրանի հետ բանակցություններն էին Հորմուզի նեղուցով նավթի փոխադրման անվտանգ ուղիները պահպանելու համար, ինչը նպաստեց մատակարարման լուրջ խափանումների սպառնալիքի նվազեցմանը»։

«Ես պետք է ներողություն խնդրեմ ժողովրդից նավթի գների փոփոխության հետևանքով առաջացած խառնաշփոթի համար։ Մենք վստահեցնում ենք հանրությանը, որ նավթի պաշարները բավարար են», - ասել է նա՝ նշելով, որ Թաիլանդի նավթի պաշարները կարճ ժամանակահատվածում 62-ից աճել են մինչև 100 օր, ինչը «մի քանի տարվա ընթացքում ամենաբարձր մակարդակն է»։

Թաիլանդի վարչապետը կոչ է արել երկրի բնակչությանը միանալ «Մեկ ընտանիք, մեկ լիտր» կարգախոսով էներգախնայողության արշավին։ Նա նշել է, որ եթե 10 միլիոն տնային տնտեսություններ օրական ընդամենը մեկ լիտրով կրճատեն նավթամթերքի սպառումը, Թաիլանդը կարող է ներմուծումը կրճատել մինչև 10 միլիոն լիտր։

Չանվիրակունը ընդգծել է, որ դա, իր հերթին, կնվազեցնի կառավարության սուբսիդիաները օրական ավելի քան 200 միլիոն բատով (6 միլիոն դոլար) և տնային տնտեսությունների ծախսերը օրական ավելի քան 400 միլիոն բատով (12 միլիոն դոլար)։