Երիտասարդ վարձակալները հրաժարվում են հյուրասենյակներից․ բնակարանային ճգնաժամը փոխում է առաջնահերթությունները

ԱՄՆ-ում բնակարանների թանկացումը փոխում է երիտասարդ վարձակալների ընտրությունը․ ավելի ու ավելի շատ մարդիկ նախընտրում են բնակարաններ առանց հյուրասենյակի՝ փոխարենը ընտրելով լավ տեղակայված և հարմարություններով ապահովված տարբերակներ։ Reuters-ի հաղորդմամբ՝ Նյու Յորքում բնակվող 25-ամյա Ջեն Սիերան պատմում է, որ սկզբում չէր էլ պատկերացնում, որ կարելի է վարձակալել մի բնակարան, որտեղ կան առանձին ննջասենյակներ, բայց բացակայում է հյուրասենյակը։ Սակայն բարձր գներն ստիպել են վերանայել սպասելիքները և ընտրել ավելի մատչելի տարբերակ։

Սիերան, որը ներկայում բնակվում է Քուինսում՝ ամսական մոտ 3700 դոլար վարձավճարով, ընտրել է բնակարան առանց հյուրասենյակի՝ փոխարենը ստանալով ավելի որակյալ շենք և հավելյալ հարմարություններ՝ մարզասրահ, լվացքատուն, անվտանգության ծառայություն և այլն։ Նա նշում է, որ նման պայմաններում պարզապես հարմարեցրել են տարածքը՝ փոքր հավաքների համար օգտագործելով այլ լուծումներ, իսկ ընկերների հետ հանդիպումների համար երբեմն օգտվում են շենքի ընդհանուր տարածքներից։

Փորձագետների տվյալներով՝ ԱՄՆ-ում առանց հյուրասենյակի համատեղ վարձակալությունների թիվը վերջին հինգ տարիներին գրեթե եռապատկվել է, իսկ վարձակալների մոտ 60%-ը մինչև 35 տարեկան է։ Մասնագետները նշում են, որ բնակարանների գների աճը ստիպում է երիտասարդներին վերանայել «անհրաժեշտ» տարածքների պատկերացումը և կենտրոնանալ ֆինանսական նպատակների վրա՝ խնայողություն, պարտքերի մարում կամ սեփական տուն ձեռք բերելու հեռանկար։