Հուսիների ներգրավումը կարող է նոր հարված հասցնել նավթային շուկային

Հուսիների հնարավոր ներգրավումը Մերձավոր Արևելքի հակամարտությանը կարող է լրջորեն սրել իրավիճակը նավթի մատակարարումների և ծովային փոխադրումների ոլորտում։ Այս մասին գրում է CNN-ը՝ նշելով, որ արդեն չորս շաբաթ փակված Օրմուզի նեղուցի ֆոնին վտանգի տակ կարող են հայտնվել նաև Բաբ էլ-Մանդեբ նեղուցով իրականացվող մատակարարումները, որը կապում է Կարմիր ծովը Հնդկական օվկիանոսի հետ։

Տվյալների համաձայն՝ այս երթուղով իրականացվում է ծովային ճանապարհով տեղափոխվող նավթի մոտ 12 տոկոսը, ինչպես նաև գազի և բեռնարկղային փոխադրումների զգալի հատվածը։ Իրանի ափերի երկայնքով մատակարարումների խափանման պայմաններում Սաուդյան Արաբիան արդեն ավելացրել է նավթի արտահանումը Կարմիր ծովի ուղղությամբ՝ փորձելով փոխհատուցել կորուստները։

Հուսիները սկսել էին հարձակվել առևտրային նավերի վրա դեռևս 2023 թվականի հոկտեմբերին՝ Իսրայել-Պաղեստին հակամարտության սկսվելուց հետո, և միայն ամիսներ անց դադարեցրել էին այդ գործողությունները։ Սակայն մարտի 28-ին հայտնի դարձավ, որ «Անսար Ալլահ» շարժման զինյալները նոր պատերազմի մեկնարկից հետո առաջին անգամ հրթիռային հարված են հասցրել Իսրայելին, ինչը նոր լարվածություն է առաջացնում տարածաշրջանում և ազդում նավթի գների տատանումների վրա։