Եգիպտոսի իշխանությունները տանկեր են մտցնում Պորտ Սաիդ

Եգիպտոսում շարունակվում են զանգվածային անկարգությունները: Զոհերի քանակն արդեն հասնում է մի քանի տասնյակի: Մայրաքաղաք Կահիրեում ամբոխը գրոհել է ՆԳՆ-ի շենքի վրա: Ցուցարարներին ցրել են արցունքաբեր գազով:

Բախումները երկրում սկսվել էին 2011-ի հեղափոխության հաղթանակի 2-րդ տարեդարձի նշման ժամանակ: Հատկապես սուր է իրավիճակը Սուեզում: Այնտեղ ցուցարարները այրել են ոստիկանական մի բաժանմունք, իսկ դրանից առաջ բաց էին թողել բոլոր բանտարկյալներին ու առգրավել այնտեղ առկա զենքն ու զինամթերքը: Այժմ բախումները շարունակվում են Պորտ Սաիդ նավահանգստային քաղաքում, ուր անկարգությունների արդյունքում զոհվել է 36, վիրավորվել` 300-ից ավել մարդ: Իշխանությունները տանկեր են մտցրել քաղաք, սակայն մարտերը շարունակվում են: Այստեղ բախումների համար առիթ է դարձել նախորդ տարվա ֆուտբոլային անկարգությունների մեջ մեղադրվող 21 տեղաբնիկներին կախաղան հանելու որոշումը:

Այս պահին Սուեզում նույնիսկ կրակահերթ է արձակվում նավերի ուղղությամբ: Զինվորականները հրաման են ստացել ոչնչացնել նավերը գրոհել փորձող ցանկացած փորձ:

Հիշեցնենք, որ Եգիպտոսի դատարանի որոշմամբ՝ կախաղան են բարձրացվել 1 տարի առաջ Պորտ-Սայիդ քաղաքի մարզադաշտում տեղի ունեցած բախումների գործով մեղադրվող 21 անձինք: Կախաղան բարձրացնելու բոլոր փաստաթղթերը հանձնվելու են երկրի գլխավոր մուֆթի Ալի Գոմայի վերանայմանը: 

Նշենք, որ անցյալ տարի` փետրվարի 1-ին, Կահիրեի հյուսիսում գտնվող Պորտ Սաիդ մարզադաշտում ֆուտբոլային հանդիպումից հետո բախումներ տեղի ունեցան տեղի «Ալ Մասրիի» և մայրաքաղաքային «Ալ Ահլի» ֆուտբոլային ակումբների կողմնակիցների միջև, երբ զոհվեց 74 մարդ, հարյուրավոր մարդիկ վիրավորվեցին: Զոհվածների մեծ մասը 18 տարեկանից փոքր էին:

Ականատեսների վկայությամբ՝ ամբոխի ճնշման տակ մարդիկ ընկնում էին մի քանի մետր բարձրություն ունեցող հարթակից:

Ընդհանուր առմամբ՝ այս գործով հարցաքննվել է 73 մեղադրյալ: Մնացածի վերաբերյալ դատական որոշում կկայացվի մարտի 9-ին: