Զելենսկին կտրուկ արձագանքել է Rheinmetall-ի ղեկավարին․ «Տնային տնտեսուհիներն էլ կարող են ղեկավարել ձեր ընկերությունը»

Ուկրաինայի նախագահ Վլադիմիր Զելենսկին սուր արձագանք է տվել գերմանական Rheinmetall պաշտպանական ընկերության ղեկավար Արմին Պապպերգերի հայտարարություններին՝ կապված ուկրաինական արտադրության անօդաչուների հետ։ Նրա խոսքերը փոխանցում է «Политика Страны» Telegram-ալիքը։

Զելենսկին հեգնանքով նշել է, որ եթե, ինչպես պնդում է Rheinmetall-ի ղեկավարը, ուկրաինական դռոնները պատրաստում են նույնիսկ տնային տնտեսուհիները, ապա նույն տրամաբանությամբ նրանք կարող են նաև ղեկավարել այդ ընկերությունը։ Այս հայտարարությունը դարձել է պատասխան Պապպերգերի քննադատությանը, ով պնդել էր, թե ուկրաինական անօդաչուները քիչ օգտակար են արևմտյան պաշտպանության համար։

Ավելի վաղ Rheinmetall-ի ղեկավարը հայտարարել էր, որ Ուկրաինայում դռոնների արտադրությունը նման է «Lego-ի խաղի», որտեղ նույնիսկ տնային պայմաններում 3D տպիչներով պատրաստվում են սարքերի մասեր։ Նրա կարծիքով՝ նման տեխնոլոգիաները չեն կարող լուրջ փոփոխություն բերել պաշտպանական ոլորտում, ինչը և առաջացրել է Կիևի կտրուկ արձագանքը։