Ռուսաստանում գնաճը «սառչում է», բայց ռիսկերը մնում են․ ԿԲ-ն զգուշացնում է

Ռուսաստանի Կենտրոնական բանկում հայտարարել են, որ սպառողական գների աճի դինամիկան սկսում է աստիճանաբար կայունանալ՝ տարվա սկզբին արձանագրված կտրուկ աճից հետո։ Այս մասին հայտնել է դրամավարկային քաղաքականության դեպարտամենտի ղեկավար Անդրեյ Գանգանը՝ ընդգծելով, որ հունվարին արձանագրված գնաճը հիմնականում պայմանավորված էր ԱԱՀ-ի բարձրացմամբ և ունեցել է միանգամյա ազդեցություն։

Նրա խոսքով՝ արդեն փետրվարից գների աճը սկսել է վերադառնալ ավելի հավասարակշռված ուղու։ Գնաճի որոշակի դանդաղումը դարձել է նաև այն գործոններից մեկը, որի արդյունքում Կենտրոնական բանկը մարտին նվազեցրել է հիմնական տոկոսադրույքը՝ 15.5 տոկոսից մինչև 15 տոկոս։

Սակայն կարգավորիչը շարունակում է զգուշավոր դիրքորոշում պահպանել։ ԿԲ ղեկավար Էլվիրա Նաբիուլինան նշել է, որ բարձր գնաճային սպասումները դեռևս խոչընդոտում են ավելի ակտիվ մեղմ քաղաքականությանը։ Մարտին այդ ցուցանիշը հասել է 13.4 տոկոսի, իսկ ընդհանուր գնաճը՝ մոտ 5.83 տոկոսի՝ զգալիորեն գերազանցելով թիրախային 4 տոկոսը, ինչը նշանակում է, որ առաջիկա որոշումները կարող են լինել ավելի զգուշավոր։