Իսրայելը արգելել է կարդինալին մուտք գործել Սուրբ Հարության տաճար

Իսրայելի ոստիկանությունը արգելել է Երուսաղեմի կաթոլիկ կարդինալ Պիերբատիստա Պիցցաբալային մասնակցել Ծաղկազարդի պատարագին Սուրբ Հարության տաճարում, ինչը միջազգային բողոքի ալիք է բարձրացրել։ Reuters-ի փոխանցմամբ՝ արգելքը հիմնավորվել է Իրանի հետ պատերազմի պայմաններում անվտանգության նկատառումներով, սակայն եկեղեցին հայտարարել է, որ նման դեպք «դարերով չի եղել»։

Միջադեպից հետո Իսրայելի վարչապետ Բենիամին Նեթանյահուն միջամտել է և կարգադրել ապահովել կարդինալի լիարժեք մուտքը Սուրբ շաբաթվա մնացած օրերին։ Ոստիկանությունը նշել է, որ Երուսաղեմի Հին քաղաքում գտնվող սրբավայրերը փակվել են բոլոր հավատացյալների համար՝ անվտանգության բարձր ռիսկերի պատճառով, հատկապես այն վայրերում, որտեղ չկան պատսպարման պայմաններ։

Սահմանափակումները ազդել են ոչ միայն քրիստոնյաների, այլև մուսուլմանների և հրեաների վրա՝ խաթարելով Զատկի, Ռամադանի և Պեսախի արարողությունները։ Դեպքը քննադատության է արժանացել մի շարք երկրների կողմից, այդ թվում՝ Ֆրանսիայի և Իտալիայի ղեկավարների, որոնք հայտարարել են, որ նման քայլերը խաթարում են Երուսաղեմի սրբավայրերի կարգավիճակը և կրոնական ազատությունները։