Գիտնականները բացահայտել են հիշողության վատթարացումը դանդաղեցնելու արդյունավետ միջոցը

Գիտնականները եկել են եզրակացության, որ աղիքային միկրոֆլորայի վիճակը կարող է կարևոր դեր ունենալ հիշողության վատթարացման դանդաղեցման և նեյրոդեգեներատիվ հիվանդությունների կանխման գործում։ Այս արդյունքները ստացվել են ավելի քան 4.2 հազար մասնակցի ընդգրկմամբ 15 կլինիկական հետազոտությունների վերլուծությունից և հրապարակվել են Nutrition Research գիտական հանդեսում։

Ուսումնասիրությունը ցույց է տվել, որ սննդակարգի փոփոխությունը, պրոբիոտիկների օգտագործումը և աղիքային միկրոբիոտայի փոխպատվաստումը կարող են դրական ազդեցություն ունենալ ուղեղի աշխատանքի վրա։ Մասնավորապես՝ բարելավվում են հիշողությունը, մտածողության արագությունը և ընդհանուր ճանաչողական գործառույթները, հատկապես՝ վաղ փուլում խնդիրներ ունեցող մարդկանց մոտ։

Գիտնականների գնահատմամբ՝ այս մեթոդները մեծացնում են օգտակար բակտերիաների բազմազանությունը, նվազեցնում բորբոքային գործընթացները և խթանում ուղեղը պաշտպանող նյութերի արտադրությունը։ Թեև զարգացած դեմենցիայի դեպքում ազդեցությունը սահմանափակ է, արդյունքները ցույց են տալիս, որ աղիքային միկրոֆլորայի կարգավորումը կարող է դառնալ կարևոր ուղղություն հիշողության տարիքային անկումը կանխելու համար։