Դերիպասկան առաջարկել է անցնել 12-ժամյա աշխատանքային օրվա և վեցօրյա շաբաթի

Ռուսաստանցի միլիարդատեր Օլեգ Դերիպասկան հայտարարել է, որ երկրի տնտեսական ճգնաժամից դուրս գալու համար անհրաժեշտ է անցնել 12-ժամյա աշխատանքային օրվա և վեցօրյա աշխատանքային շաբաթի։ Այս մասին նա գրել է իր Telegram-ալիքում՝ ընդգծելով, որ Ռուսաստանը գտնվում է բարդ վերափոխման փուլում։

Դերիպասկայի խոսքով՝ երկրում առկա ռեսուրսները սահմանափակ են, և հիմնական առավելությունը մարդկանց աշխատունակությունն է։ Նա կարծում է, որ որքան արագ հասարակությունը անցնի «առավոտյան 8-ից մինչև երեկոյան 8» աշխատանքային գրաֆիկի՝ ներառյալ շաբաթ օրը, այնքան արագ կհաղթահարվեն տնտեսական դժվարությունները։

Միլիարդատերը նաև նշել է, որ նման ռեժիմով աշխատող մարդիկ արդեն գոյություն ունեն դեռ 1990-ականներից, և նրանք ավելի պատրաստ կլինեն նոր պայմաններին։ Նրա գնահատմամբ՝ ներկայիս խնդիրները հնարավոր չէ լուծել միայն դրամավարկային քաղաքականության մեղմացմամբ կամ ռուբլու արժեզրկմամբ, քանի որ տնտեսական համակարգը կանգնած է ավելի խորքային մարտահրավերների առաջ։