Արսեն Թորոսյանի նախագահությամբ տեղի է ունեցել նախարարին կից հասարակական խորհրդի հերթական նիստը

 Աշխատանքի և սոցիալական հարցերի նախարար Արսեն Թորոսյանի նախագահությամբ տեղի է ունեցել նախարարին կից հասարակական խորհրդի հերթական նիստը. քննարկվել են զբաղվածության ոլորտի առաջնահերթություններն ու գործող ծրագրերը։ Կարևորելով մրցունակ աշխատուժի ձևավորման ու աշխատանքային հնարավորությունների ընդլայնման միջոցով զբաղվածության խթանմանն ուղղված ծրագրերի դերը՝ նախարարը նշել է, որ ոլորտի բարեփոխումների առանցքում հնարավորությունների ստեղծումն է՝ մարդուն ապահովելով արժանապատիվ, մշտական ու պետության զարգացմանը նպաստող աշխատանքով։

Այս համատեքստում ընդգծել է նաև աշխատանք փնտրողների և գործատուների փոխգործակցության, սոցիալական գործընկերության զարգացման, ավագ սերնդի ներուժի օգտագործմանն ու աշխատանքային իրավունքների իրացմանն ուղղված աշխատանքների շարունակականությունը։ Նախարարի տեղակալ Լուսինե Քոչարյանն ու ՄՍԾ պետի տեղակալ Լիանա Թովմասյանը խորհրդի անդամներին ներկայացրել են զբաղվածության ընթացիկ ծրագրերի՝ Ղարաբաղից տեղահանված անձանց ինքնազբաղվածության խթանման, կարճաժամկետ ուսուցման դասընթացի և աշխատանքային փորձի ձեռքբերման, անձնական օգնականի ծառայության տրամադրման, անհուսալի վարկեր ունեցող անձանց տնտեսական ակտիվության խթանման մանրամասներն ու արդյունքները։ 

Քննարկվել է նաև 63-ից բարձր, ինչպես նաև հաշմանդամություն ունեցող անձանց զբաղվածության ծրագիրը, որը ներկայումս գտնվում է հանրային քննարկման փուլում։ Նիստը շարունակվել է հարցուպատասխանի ձևաչափով, որի շրջանակում խորհրդի անդամները բարձրաձայնել են իրենց հետաքրքրող հարցերը, հանդես եկել մի շարք առաջարկություններով։