Նավթի գները փլուզվել են․ Brent-ը իջել է 100 դոլարից ցածր

Միջազգային շուկաներում նավթի գները կտրուկ նվազել են․ Brent տեսակի նավթի մեկ բարելի արժեքը ընկել է 100 դոլարից ցածր՝ ըստ Լոնդոնի ICE բորսայի տվյալների։ Հյուսիսծովյան этալոնային Brent-ը նվազել է շուրջ 4%-ով՝ առաջին անգամ մարտի 27-ից հետո հատելով այդ հոգեբանական շեմը։ Նվազման ամենացածր կետում գինը հասել է 98.85 դոլարի, իսկ ամերիկյան WTI նավթը մայիսյան մատակարարումով արժեզրկվել է 4.38%-ով՝ հասնելով 96.94 դոլարի։

Շուկաներում անկումը պայմանավորված է գլոբալ անորոշությամբ և աշխարհաքաղաքական զարգացումներով։ Մասնավորապես, շրջանառվող լուրերը Մերձավոր Արևելքում հակամարտության հնարավոր ավարտի մասին, ինչպես նաև ԱՄՆ նախագահ Դոնալդ Թրամփի հայտարարությունները՝ Իրանի դեմ մոտակա շաբաթներին հնարավոր ռազմական գործողության վերաբերյալ, զգալի ազդեցություն են ունեցել գների վրա։ Վերլուծաբանները նշում են, որ անկումը կապված է նաև ասիական շուկաների ժամանակավոր հանգստի և ներդրողների կողմից շահույթի ֆիքսման հետ։

Միևնույն ժամանակ, Financial Times-ի տվյալներով՝ ԱՄՆ–Իրան հակամարտությունից հետո ասիական երկրները բախվել են էներգետիկ լուրջ խնդիրների և սկսել են նավթ գնել Ռուսաստանից։ Հարավային Կորեան և Ֆիլիպինները արդեն ստացել են ռուսական նավթի մատակարարումներ, իսկ Վիետնամն ու Շրի Լանկան բանակցում են։ Թաիլանդն ու Ինդոնեզիան ևս հայտարարել են ներմուծում սկսելու պատրաստակամության մասին՝ շեղվելով Մերձավոր Արևելքից ավանդական կախվածությունից։