Samsung-ի սմարթֆոնները թանկանում են․ ապրիլի 1-ից գները բարձրանում են

Samsung ընկերությունը պատրաստվում է բարձրացնել իր որոշ ֆլագման սմարթֆոնների գները։ Կորեական Newsway պարբերականի փոխանցմամբ՝ գնաճը պայմանավորված է շուկայում առաջացած ճգնաժամով և հատկապես հիշողության բաղադրիչների արժեքի կտրուկ աճով։ Ապրիլի 1-ից հատկապես կթանկանան ծալվող Galaxy Z Fold 7 և Flip 7 մոդելները՝ 512 ԳԲ հիշողությամբ տարբերակները կթանկանան մոտ 100 հազար վոնով։

Գնաճը կազդի նաև Galaxy S25 Edge մոդելի վրա, որը նույնպես կթանկանա նույն չափով։ Ներկայում Fold 7-ը վաճառվում է մոտ 2.5 միլիոն վոնով, Flip 7-ը՝ 1.6 միլիոն վոնով, իսկ S25 Edge-ը՝ նույնպես 1.6 միլիոն վոն։ Առայժմ գների բարձրացումը նախատեսվում է միայն Հարավային Կորեայում, սակայն մասնագետները կարծում են, որ այն կարող է դառնալ գլոբալ միտում։

Samsung-ը վերջին շրջանում արդեն մի քանի անգամ բարձրացրել է իր սարքերի գները։ Օրինակ՝ Galaxy S26 շարքի սմարթֆոնները վաճառքի են հանվել նախորդ սերնդից շուրջ 300 հազար վոնով ավելի թանկ։ Նմանատիպ քայլեր են նկատվում նաև տեխնոլոգիական այլ ընկերությունների մոտ․ Sony-ն ապրիլի 1-ից բարձրացրել է PlayStation 5 խաղային կոնսոլների գները ամբողջ աշխարհում՝ դա պայմանավորելով գլոբալ տնտեսական ճնշումներով։