Lenta.ru. Պուտինը և Փաշինյանը կհանդիպեն Մոսկվայում՝ աշխատանքային նախաճաշի ձևաչափով

Ռուսաստանի նախագահ Վլադիմիր Պուտինը և Հայաստանի վարչապետ Նիկոլ Փաշինյանը կհանդիպեն ապրիլի 2-ին Մոսկվայում՝ դիվանագիտական նախաճաշի շրջանակում։ Այս մասին հայտնել է Կրեմլի խոսնակ Դմիտրի Պեսկովը՝ նշելով, որ հանդիպումը տեղի կունենա պաշտոնական այցի ընթացքում։

Պեսկովի խոսքով՝ նախ կկայանան ռուսական և հայկական պատվիրակությունների բանակցությունները, որոնց ընթացքում կքննարկվեն տարածաշրջանային հարցեր, այդ թվում՝ տրանսպորտային հաղորդակցությունների թեմաները։ Դրանից հետո երկու երկրների ղեկավարները կշարունակեն քննարկումները արդեն առանձին՝ աշխատանքային նախաճաշի ձևաչափով։

Ավելի վաղ Նիկոլ Փաշինյանը հայտարարել էր, որ Ռուսաստանը շարունակում է մնալ Հայաստանի գործընկերը և ընդգծել էր, որ նախատեսում է մոտ ապագայում այցելել Մոսկվա։ Նրա այս հայտարարությունը հնչել էր Երևանի բնակչի հարցին ի պատասխան՝ հայ-ռուսական հարաբերությունների պահպանման թեմայով։