Կալասը մտահոգված է ՆԱՏՕ-ից դուրս գալու մասին Թրամփի խոսքերից

ԱՄՆ նախագահ Դոնալդ Թրամփի հայտարարությունները երկրի Հյուսիսատլանտյան դաշինքից հնարավոր դուրս գալու մասին մտահոգիչ ազդանշան են դաշնակիցների համար, հայտարարել է ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը։

«Սա շատ դժվար իրավիճակ է, քանի որ ԱՄՆ նախագահի խոսքերը, անկասկած, կշիռ ունեն և արտացոլում են նրա մտածողությունը: Քանի որ ԱՄՆ նախագահը հսկայական ազդեցություն ունի, սա, անկասկած, մտահոգիչ ազդանշան է: Բայց հիմա հարցն այն է, թե ի՞նչ պետք է անենք դրա հետ կապված: Սա իսկական նախատինք է», - ասել է նա ERR ազգային հանրային հեռարձակողին:

Եվրոպական դիվանագիտության ղեկավարը ընդգծել է, որ նման հայտարարությունները չեն ամրապնդում ո՛չ Վաշինգտոնին, ո՛չ էլ նրա դաշնակիցներին:

Նա նաև պնդել է, որ դաշինքը ԱՄՆ-ից որևէ խնդրանք չի ստացել Իրանի դեմ ռազմական գործողության հարցում օգնության համար: «Ինչքան ես գիտեմ, ՆԱՏՕ-ին որևէ խնդրանք չի եղել: Մեղադրանքները, որ ՆԱՏՕ-ն չի եկել օգնության, չեն կարող արդարացված համարվել», - ասել է Կալլասը:

Ավելի վաղ՝ Reuters-ին տված հարցազրույցում Թրամփը հայտարարել էր, որ զզվում է ՆԱՏՕ-ից և մտածում է ԱՄՆ-ին դաշինքից դուրս բերելու մասին: The Daily Telegraph-ին տված հարցազրույցում ամերիկացի առաջնորդը բացատրել է, որ մտածում է վերանայել ԱՄՆ-ի մասնակցությունը ՆԱՏՕ-ին, քանի որ դաշինքը չի աջակցել Վաշինգտոնին Իրանի դեմ պատերազմում: Նույն հարցազրույցում ամերիկացի առաջնորդը ՆԱՏՕ-ն անվանել է «թղթե վագր» և խոստովանել, որ երբեք մեծ համակրանք չի զգացել դրա նկատմամբ: