Շուկայից հեռացած Mazda-ն բում է գրանցում․ եկամուտները աճել են գրեթե 17 անգամ. ՌԴ

Ռուսաստանում գործող Mazda-ի տեղական կառույցի՝ «Մազդա մотор Ռուս»-ի եկամուտները ավտոմեքենաների վաճառքից 2025 թվականին կտրուկ աճել են՝ հասնելով 3,04 միլիարդ ռուբլու։ Այս մասին հայտնում է «Կոմերսանտը»՝ հղում անելով ընկերության ֆինանսական հաշվետվությանը։ Սա գրեթե 17-ապատիկ աճ է՝ նախորդ տարվա համեմատ։

Աղբյուրների փոխանցմամբ՝ ընկերությունը Ռուսաստանում շարունակում է վաճառել ավտոմեքենաներ՝ օգտագործելով զուգահեռ ներմուծման մեխանիզմը։ 2025-ը դարձել է առաջին տարին 2022-ից հետո, երբ ավտոմեքենաների վաճառքը կրկին դարձել է ընկերության հիմնական եկամտի աղբյուրը։ Ընդհանուր շրջանառությունը կազմել է 3,9 միլիարդ ռուբլի՝ աճելով 2,4 անգամ, իսկ մաքուր շահույթը հասել է 1,9 միլիարդի։ Միաժամանակ պահեստամասերի վաճառքը նվազել է 27%-ով, իսկ սպասարկման ծառայություններից եկամուտները կտրուկ ընկել են՝ շուրջ 72%-ով։

Վերլուծաբանների գնահատմամբ՝ աճը պայմանավորված է նոր մոդելների վերադարձով և շուկայում պահանջարկի բարձրացմամբ։ Մասնավորապես, Mazda CX-5 և CX-50 մոդելների վաճառքը կրկին ակտիվացել է, իսկ CX-5-ը դարձել է ամենապահանջվածներից՝ մրցունակ գնի և նպաստավոր պայմանների շնորհիվ։ Ընդհանուր առմամբ 2025 թվականին Ռուսաստանում վաճառվել է մոտ 6,9 հազար նոր Mazda, ինչը 49%-ով ավել է նախորդ տարվա ցուցանիշից։