Կրեմլ. Ռազմական գործողությունների ակտիվ փուլը կավարտվի Դոնբասից Ուկրաինայի զորքերի դուրսբերման դեպքում

Կրեմլի խոսնակ Դմիտրի Պեսկովը հայտարարել է, որ «հատուկ ռազմական գործողության» ակտիվ փուլը կարող է ավարտվել միայն այն դեպքում, եթե Ուկրաինայի զինված ուժերը դուրս բերվեն Դոնբասից։ Այս մասին հայտնում է «Լենտա.ռու»-ն՝ հղում անելով ՏԱՍՍ-ին։

Պեսկովի խոսքով՝ հենց այդ պայմանն է անհրաժեշտ ռազմական գործողությունների ինտենսիվությունը դադարեցնելու համար։ Միաժամանակ նա ընդգծել է, որ Ռուսաստանը Ուկրաինայի համար կոնկրետ ժամկետներ չի սահմանում զորքերի դուրսբերման հարցում։

Ավելի վաղ Ուկրաինայի նախագահ Վլադիմիր Զելենսկին հայտարարել էր, որ Մերձավոր Արևելքում ստեղծված իրավիճակի պատճառով ԱՄՆ վարչակազմը խուսափում է բանակցություններից այլ երկրներում, իսկ ռուսական կողմը, նրա խոսքով, չի ցանկանում բանակցություններ վարել ԱՄՆ-ում։