Իրանի շուրջ ճգնաժամը սպառնում է համաշխարհային սննդի շուկային․ գները կարող են կտրուկ աճել

Մերձավոր Արևելքում երկարաձգվող հակամարտությունը կարող է լուրջ հարված հասցնել համաշխարհային պարենային շուկային՝ առաջ բերելով սննդամթերքի գների նոր աճ։ Այս մասին զգուշացրել է ՄԱԿ-ի Պարենի և գյուղատնտեսության կազմակերպությունը (FAO)՝ նշելով, որ 2026 թվականի մարտին արդեն գրանցվել է գների ամենաբարձր մակարդակը 2025 թվականի սեպտեմբերից ի վեր։ Reuters-ի փոխանցմամբ՝ իրավիճակը կարող է ավելի վատթարանալ, եթե ճգնաժամը շարունակվի։

FAO-ի գնահատմամբ՝ եթե հակամարտությունը տևի ավելի քան 40 օր և էներգակիրների ու պարարտանյութերի գները մնան բարձր, աշխարհով մեկ ֆերմերները կարող են կրճատել արտադրությունը։ Բացի այդ, նրանք կարող են անցնել այնպիսի մշակաբույսերի աճեցմանը, որոնք պահանջում են ավելի քիչ պարարտանյութ, ինչը նույնպես կազդի շուկայի առաջարկի վրա։

Մարտին պարենային գների ինդեքսը աճել է 2.4 տոկոսով՝ փետրվարի համեմատ։ Հացահատիկի գներն աճել են մոտ 1.5 տոկոսով, բուսական յուղերը՝ 5.1 տոկոսով՝ հասնելով 2022 թվականի կեսերից ի վեր ամենաբարձր մակարդակին, իսկ մսի գները բարձրացել են շուրջ 1 տոկոսով։ Միևնույն ժամանակ շաքարի գներն էլ կտրուկ աճել են՝ հասնելով 2025 թվականի հոկտեմբերից ի վեր առավելագույնին, ինչը ևս կապված է տարածաշրջանում ընթացող ռազմական գործողությունների հետ։