Ռուսաստանում արձագանքել են Զելենսկու դիրքորոշմանը․ Դոնբասից դուրսբերումը չեն համարում վերջնական լուծում

Ռուսաստանի Պետդումայի պաշտպանության հանձնաժողովի անդամ, գեներալ-լեյտենանտ Վիկտոր Սոբոլևը հայտարարել է, որ Ուկրաինայի զինված ուժերի դուրսբերումը Դոնբասից չի նշանակի հատուկ ռազմական գործողության նպատակների լիարժեք իրականացում։ Ինչպես հայտնում է «Լենտա.ռու»-ն, նա այսպես է արձագանքել Ուկրաինայի նախագահ Վլադիմիր Զելենսկու հրաժարմանը՝ դուրս բերել զորքերը տարածաշրջանից։

Սոբոլևի խոսքով՝ նույնիսկ նման քայլի դեպքում Արևմուտքը կարող է շարունակել զինել Ուկրաինային, ինչը, նրա գնահատմամբ, կարող է բերել նոր, ավելի ծանր պատերազմի մեկ-երկու տարվա ընթացքում։ Նա նշել է, որ Ռուսաստանի համար առավել ընդունելի տարբերակն է Ուկրաինայի արևմտյան սահմաններ հասնելը, հանրաքվե անցկացնելը և հետագայում միասնական միութենական պետություն ստեղծելը՝ Ռուսաստանի, Ուկրաինայի և Բելառուսի միջև։

Ավելի վաղ Զելենսկին հայտարարել էր, որ Կիևը չի համաձայնում ռուսական պահանջին՝ դուրս բերել զորքերը Դոնբասից։ Իր հերթին, ՌԴ նախագահի խոսնակ Դմիտրի Պեսկովը նշել է, որ նման որոշումը կարող է փրկել բազմաթիվ կյանքեր և կանգնեցնել հակամարտության ակտիվ փուլը՝ ընդգծելով, որ դա պետք է ընդունվի հնարավորինս շուտ։